ANG Davao Occidental Tigers mas nangisog tungod sa dahunog nga suporta sa mga Dabawenyo aron mogukod sa uwahing bahin ug masamaran sa kapildihan ang Valenzuela Classics, 92-85, sa unang homecourt game sa nagapadayong Maharlika Pilipinas Basketball League (MPBL) Datu Cup 2018 didto sa University of Southeastern Philippines (Usep) Gymnasium niadtong Huwebes gabii.
Ang maong daug ang mialsa sa Tigers nga makuha ang solo ikaduhang puwesto, 5-3 sa Group B (South Division) diin ang nanguna mao ang Muntinlupa Cagers nga dunay limpyong 5-0.
Ang mibisita Classics, natagak sa ikasiyam nga puwesto sa Group A (North Division) sa 2-4 win loss standing.
Nakahatag og dakong kalipay sa Tigers ang ilang pagdaug nga natuman nila alang sa unang home court game diin kini sab ang unang gihimong duwa sa torneyo sa Mindanao gikan sa pagsugod.
“Valenzuela is a very tough team. Like what I said 'win at all cost' right? We prepared them mentally to be ready for this game, when tired, never give up,” pahayag ni Tigers head coach Don Dulay sa pakighinabi sa SunStar Davao.
Si Billy Ray “The Ilonggo Superman” Robles ang giilang Powerade best player of the game human milabay og 21 puntos ug 10 rebounds.
“Yung mindset lang namin kailangan namin manalo kasi homecourt namin at sundin lang namin yung advice ni coach at yung depensa,” sulti sa kanhi PBA players.
Mibilin ang Tigers og nindot impresyon sa Davao human miapas sa 20-13 sa unang period apan ang Classics misulay pa og molamang sa ikaduhang kanto nga miduol pa sa 27-29.
Ang Tigers napabiling lamang apan ang Valenzuela team wa misurender dayon hangtud naabot sa krusyal sa duwa sa final period ug naseguro ang 83-74 sa 1:19 minutos nabilin hangtud nakuha ang kadaugan.
Midagan dayon ang Tigers sa Malita, Davao Occidental kagahapon aron magpahigayon og libreng basketball clinic alang sa mga kabatan-onan.
Sunod nilang makalaban ang Pasay Voyagers sa Septyembre 19 apan mobalik dinhi sa Oktubre 20 alang sa laing home court game.
Samtang ang Pasig Pirates naka-eskapo sa Rizal Crusaders 81-78 sa unang duwa.