“AKO ra jud ang way special awards. Even sa top 5 ako ray way laing nakuha. But the crown was more than enough,” ni Benjamin Petilos, o mas nailang Lady Bam, ang unang Queen Size Philippines ug garbo sa Davao City.
Kinsa ba ang wa kaila ni Lady Bam, diin luyo nga siya misikat sa iyang pasiaw sa nagkadaiyang local shows sa ABS-CBN Davao, may radio program sab siya, ug raket as events host sa mga kasikas sa siyudad.
Ka-compete ang laing 15 ka mga “queen size” beauties, gibansiwag ni Lady Bam ang Davao City sa finals nga gihimo last August 15 sa Gaisano Mall Davao.
Sa pakigtsikahan kang Lady Bam, gibutyag niining wa gyud tuyua nga makaapil siya sa kompetisyon.
“Honestly, no one forced me to join. I went there just to inquire kasi maraming Kadayawan Events and then it was July 13 a pretty good sign for it is my lucky happy number and the rest is history.”
Ang kompetisyon gipaluyuhan sa Olympus Society of Davao Inc., usa ka community organization nga may nagkadaiyang programa sama na lamang sa HIV Awareness ug uban pa.
Target sa kompetisyon nga tuldukan ang body shaming, ug i-embrace sa kung unsa ka, lakip na ang kampanya sa HIV.
Mga queen size beauties gikan sa nagkadaiyang bahin sa Pinas ang mitubag sa panawagan sa indigay, matag usa kanila may bitbit nga adbokasiya.
Sa kadaugan nga naangkon, say ni Lady Bam nga mas nadasig siya nga ipatigbabaw ang kampanya alang LGBT.
“I will continue to help the HIV Awareness campaign together with the Olympus Society. And my personal advocacy is to empower the people especially the LGBT community about self-love and self-honoring. We have to totally embrace our being and spread our gifts to the world.”
Si Maria Dennise Razakhan from General Santos City ang first runner-up; taga Dumaguete sab ang 2nd runner-up nga si Bengie Calumpang; laing taga-Davao nga si Gwen Darvin ang 3rd runner-up ug gikan Tagum ang 4th runner-up nga si MJ Elliot.
Thankful sab ang host sa radio show nga It's a Beautiful Life sa DXAB sa mga higalang misuporta sa iyang unang journey sa beauty pageant.
Ginama ang iyang gown ni Ronnie Deleon, samtang si Titing Solon sa Apparel Zone ang mimugna sa iyang puti nga up-and-down outfit.
Mas migilak sab ang kaanyag niya sa magic ni Morgo Plenos sa pagmake-up.
Nagsilbi sab nga coach niya sa pagtubag sa mga pangutana ang mga higalang sila Joan Soco and Bruce Conching.
“Grabe favors and gift of friends! My best friend na pageant coach and enthusiast since high school Jerson Cinco became my coach and my honest critic. I'm so blessed with my team and I can't thank them enough.”
Alang ni Lady Bam ang kasinatian niya sa Queen Size Philippines di kabayran og salapi, usa ka katumanan sa iyang damgo.
“It is with great pride and honor to have represented my beloved city. Di matungkad ang akong kalipay. I plan to continue to shine for the world. Try my best to spread good vibes and remind each one that we are all beautiful.”