PATAY ang duha ka municipal councilor sa nahitabong ambus, alas 10:00 sa buntag, Sabado, didto sa Barangay Katico President Quirino, Sultan Kudarat Province.

Kini ang gibutyag ni Police Chief Inspector Jomar Alexis Yap, tigpamaba sa Philippine National Police Region 12 sa pakighinabi kaniya.

Giila ni Yap ang mga namatay nga opisyal nga sila Councilor Corazon Florida sa munisipyo sa President Quirino ug Councilor Dindo Legawan sa Pandag, Maguindanao.

Subay sa imbestigasyon, ang mga biktima gibanhigan sa gibana-banaang napulo ka mga armadong tawo sa plantation sa African oil nga gipanag-iyahan ni Florida.

Nakuha gikan sa crime scene ang mga empty shells sa M16, M14 armalites ug .45 nga pistola.

Gisuta pa sa otoridad kon unsa ang motibo sa hitabo ug kon kinsa ang responsable sa insidente.

Sa pagkakaron, nagpadayon pa ang hot pursuit operation sa mga otoridad sa panghitabo.

Apan dako ang pagtuo ni Sultan Kudarat Police Provincial Director Senior Superintendent Tucao Mamalinta nga politika gyud ang motibo sa pagpamanhig patay sa mga biktima. (Edgardo Fuerzas)