ANG Dangerous Drugs Board (DDB) naningkamot nga ipatuman ang usa ka Alternative Development Program aron dili na mananom og marijuana ang mga mag-uuma sa tibuok Pilipinas.

Si Undersecretary Paul Oaminal, DDB vice chair, nagpahayag nga iyang nakita nga gikinahanglang palapdan ang ilang programa nga malampusong nasugdan sa lungsod sa Kibungan, Kapangan ug Bakun, lalawigan sa Benguet.

Sa Central Visayas giimplementar ang maong programa didto sa lungsod sa Balamban, nga nailang marijuana capital sa tibuok Kabisay-an.

Giingon nga ang kanhi nananom og marijuana sa nahisgutang mga lugar, suma ni Oaminal, nananom na karon og Abaca pinaagi sa tabang sa Fiber Industry Development Authority (Fida).

"Fida is optimistic that the program would boost the fiber industry in the Province of Cebu. The program was initiated by DDB Chairman Vicente Sotto, is set to be expanded to the cities and towns of Danao City, Toledo City, Alcoy, Dalaguete and Badian," suma ni Oaminal sa iyang suwat pamahayag nga gipadangat sa Superbalita.

Dinhi sa Mindanao, ang lungsod sa San Fernando, Bukidnon nakadawat na og grant nga duha ka milyon ka pesos sa miaging tuig aron ilang magamit sa pagpananom og Abaca.

Ang San Fernando kasikbit nga lungsod sa Cabanglasan diin gipanglarot ang mga marijuana nga gibana-banaang nagkantidad og 21 ka milyon ka pesos sa mga sakop sa Philippine Drug Enforcement Agency, Philippine National Police ug Armed Forces of the Philippines niadtong miaging semana.

Sa miaging tuig, gikan Enero 1 hangtud Disyembre 31, 2009, ang kapulisan nakahimo og 81 marijuana eradication, ang Visayas dunay 27 ka operasyon.

Kini gisundan sa Region 7 nga dunay 15 ka operasyon, gisundan sa Cordillera Administrative Region nga dunay 13 ka mga operasyon.

"The total marijuana haul last year is worth almost half a billion pesos. The accomplishment is quantified to have saved thousands of marijuana users nationwide," suma ni Oaminal.

Ang maong opisyal nagtuo nga ang supply reduction program sama sa eradikasyon ug pagpangsakmit sa mga otoridad matabangan sa alternative program alang sa mga mag-uuma aron dili na sila mananom og marijuana. (AD)