GIPUSIL-PATAY sa nag-inusarang mamumuno taliwa sa daghang tawo ang usa ka ex-convict sa tricycle parking area atubangan sa merkado publiko sa dan J. P. Laurel, dakbayan sa Carcar, alas 6:15 sa gabii niadtong Sabado.

Ang biktima mao si Erbert Camotes, 25, ulitawo apan dunay kapuyo ug taga Barangay Bolinawan sa samang dakbayan.

Click here for stories and updates on the Sinulog 2010 Festival.

Nabulit sa kaugalingong dugo dihang niabot sa Carcar District Hospital ang biktima human maigo sa daghang bala sa iyang lawas.

Naangin sa pagpamusil human natapsingan mao si Gelord Nabio, 25, ulitawo, usa ka habal-habal driver, taga Takdog, Poblacion 3, nga naigo sa wala’ng siko ug natapsingan usab ang tuong tiil ni Teresito Dela Serna, 42 anyos, minyo, taga Luwan-luwan, Poblacion 1, nga pulos ra usab gipapauli sa mga doktor human madapati og tambal.

Matod ni PO1 Renido Villareiz, desk officer on duty sa Carcar Police station, dihang nahinabi ning tigbalita niasoy nga samtang nagtambay sa nahisgutang dapit si Camotes, kalit nga miduol ang wala mailhing mamumuno dayong lanit sa dala’ng automic pistol, nga nipabuto sa makadaghang higayon, human makita nga nahagba na ang biktima, daling mipahilayo ang suspek.

“Kini si Camotes, sa miaging tuig pa ni nakagawas sa prisohan human na dismissed ang kaso niya sa drugas, pero nasulod ni kani-adto sa Muntinlupa gumikan sa kaso sa armas, ug sa miaging semana gipatawag ni sa iyang  kapuyo diri sa police station kay sige ni ug panghagis didto’s Bolinawan” batbat ni PO1 Villariez.

Hangtod ning pagsulat padayon pa ang kapulisan pagpangita sa suspek, samtang ang Hepe nga si P/Supt. Renato Malazarte, nimando na sa intelligence section pagpalawon sa imbestigasyon.

Dugang ni PO1 Villareiz, daghang anggulo ang ilang gisubay karon, usa na niini ang posibling kalambigitang sa drugas ug ang mga atraso niini kaniadto sa namatay.

Nakuha’ng ebidensya sa crime scene ang siyam ka kabhang sa bala sa 9mm pistol. (DQG)