USA ka sundalo ug usa ka contractor ang nagpabuto sa ilang mga armas tungod sa kahubog sa duha ka managlahing insidente niadtong Sabado dinhi sa siyudad sa Davao.
Ang sundalo nagpabuto sa iyang armas sa Malabog Multi-purpose Cooperative sa alas 9:05 sa gabii samtang ang contractor nagpabuto sa iyang armas sa alas 10:15 sa gabii didto sa Leonora Village, Bajada.
Ang sundalo mao si Sergeant Mario Pascula, sakop sa 72nd Infantry Brigade ug Globe detachment commander nga nahimutang didto sa Malabog, Paquibato District.
Ang blotter sa Paquibato Police Station nagpahibalo nga gireklamo si Pascula gumikan kay nagpabuto kini sa iyang armas sa makadaghan nga higayon nga miresula sa pagkahalok sa mga tawo didto sa Malabog Multi-purpose Cooperative.
Nasayran nga human nagpabuto ang sundalo didto sa maong lugar miuli kini sa ilang detachment ug didto na sab siya nagpabuto sa makadaghan nga higayon.
Gireklamo sab sa iyang mga silingan si Anecito Tan, 52, minyo, contractor, nagpuyo sa Leonora Village, Bajada human siya nagpabuto makaupat ka higayon sa iyang .45 kalibre nga pistola.
Mga silingan nangayo og police assistance kay nahadlok sila nga maigo sa pagpamusil mao nga miresponde ang mga sakop sa San Pedro Police Station.
Mga mirespondeng pulis, dihang miabot sa balay sa contractor, gipabuthan ni Tan sa makaupat nga higayon mao nga ila kining giposasan ug gipriso sa selda sa kapulisan sa San Pedro.
Nakuha sa mga pulis ang usa ka Norinco .45 caliber pistol nga dunay serial number BB02645-08-246 nga dunay duha ka magazine ug usa ka buhing bala.
Gihipus sab sa mga pulis ang walo ka basiyo sa bala sa maong armas aron himuong ebidensiya batok sa suspetsado kinsa napakyas sa pagpakita og dokumento nga magpamatuod nga legal ang iyang paghupot og armas.
Giandam na ang kasong illegal discharge of firearms sa kapulisan aron ipasaka ngadto sa korte batok sa mga suspetsado. (AD)