BINAWSANAY sa duha ka mga gang, usa ka 20-anyos nga lalake ang namatay human pusila sa gituohang mga sakop sa Crips gang sa dan F. Jaca, sityo Tugas, barangay Inayawan, siyudad sa Sugbo, pasado alas 2 kagahapon sa kaadlawon.
Gipatay ang biktima nga si Jeco Kent Rosalita, nagpuyo sa nahisgutang dapit, napagan nga sakop sa karibal nga Bloods gang sanglit ang duha ka mga kuyog niini naila mang mga sakop sa karibal nga grupo.
Matod ni PO2 Lou Pagara sa Homicide Section sa Cebu City Police Office (CCPO) nga ang biktima uban sa duha niya ka mga higala diin ang usa naila lang sa ngalan nga Macmac, paingon unta sa sityo Sto. Nino sanglit nagsaulog man kini sa kapistahan.
Pag-abot nila sa kapilya sa San Roque, ilang nasugatan ang tulo ka mga suspek, usa niini nailang si Jeffrey Laspuña.
Matod ni Pagara nga ang duha ka mga higala sa biktima nga nasutang mga sakop sa Bloods gang, nakaila sa mga suspek maong nanagan dayon kini ug nabiyaan ang biktima nga nikompiyansa ra usab nga di hilabtan sanglit di man siya miyembro sa Bloods.
Apan ang duha sa mga suspek nibunot og armas ug ang biktima maoy gipusil.
Naigo ang biktima sa agtang apan naninguha pa kini sa pagdagan apan nahagba ra usab mga 10 metros ang gilay-on.
Usa ka saksi nga nakakita sa krimen ang nitumbok kang Laspuña nga maoy nitiwas sa biktima pinaagi sa pagpusil niini.
Matod ni Pagara nga upat ka samad pinusilan ang ilang nakita sa bukobuko sa biktima.
Gisuwayan pa kini sa pagdala sa Cebu City Medical Center (CCMC) apan wa na maluwas sa mga doktor.
Mga sakop sa Pardo police station pinangulohan ni PO3 Favios Belleza ang nipahigayon og hot pursuit operation nga niresulta sa pagkasikop ni Laspuña.
Na-recover gikan sa suspek ang usa ka .357 revolver nga may lima ka mga bala ug usa ka empty shell. Usa ka slug usab ang nakuha gikan sa crime scene.
Matod ni Pagara nga ila pang ipaubos sa paraffin test si Laspuña kinsa nihimakak nga may kalambigitan sa krimen. (CPL)