GIHIMONG oportunidad ni Davao City Mayor Sarah Duterte-Carpio sa pagpasalamat ug pag-endorso og mga kandidato sa 2019 elections ang pagtambong niini sa ika-49 nga kasaulogan sa Charter sa Mandaue niadtong Huwebes sa hapon.
Si Duterte-Carpio nagpasalamat sa mga Mandauehanon sa pagsuporta niini sa kandidatura ug kampanya sa iyang amahan nga si Rodrigo, kinsa nidaug pagkapresidente niadtong 2016.
Giklaro niya nga di siya mopapili pagka-senador sa 2019 elections, apan iyang giindorso sila si Ilocos Norte Governor Imee Marcos, Senador Jinggoy Estrada ug Davao City 1st Distict Representative Karlo Nograles.
“Thank you very much sa inyohang mga taga- Mandaue. Ang amoang pamilya dunay utang kabubut-on sa inyuhang tanan sa oportunidad nga gihatag ninyo ni President Duterte nga mahimong presidente sa atong nasud. So, from all of us sa amoang pamilya, to all of you who helped. Daghan sa inyuha ang nigasto og kaugalingon nga kwarta, nipa-print og sticker, pabuhat og mga tarpaulin, pabuhat og mga t-shirt para motabang sa iyang kampanya, palihug ko og paabot sa amoang pasalamat,” ni Duterte- Carpio atol sa iyang speech.
Pasalamat maoy unang parte sa mensahe ni Duterte-Carpio ug ang ikaduha mao ang paghangyo sa mga Mandauehanon sa suporta alang sa iyang mga gi-endorso nga senador.
Sa wa pa niya gipaila-ila ang tulo ka personalidad nga lakip sa line-up sa partido nga Hugpong ng Pagbabago nga gipaluyuhan ni Duterte- Carpio, iya una nga giklaro nga di siya modagan pagka-senador, apan mopasubli siya pagbalik pagka-mayor sa dakbayan sa Davao.
“Modagan ko as the mayor of Davao City because gusto nako nga daghan ang matabangan sa Davao City nga laing local government units. Davao City is not perfect, we are an experiment laboratory of a lot of things. But duna pud mi best practices, dili tanan, but ubay-ubay pud ang amoang best practices,” sigun pa ni Duterte-Carpio.
Dugang niya nga isip mayor, mas makatampo siya sa pagpadagan sa uban LGUs.
Iya sab nga giimbitar ang mga Mandauehanon nga mobisita sa Davao ilabi na ang kagamhanan sa dakbayan.
Siya niingon nga pahibaw-on siya unsay matabang sa iyang dakbayan sa Mandaue.
Sa katapusang parte sa iyang pakigpulong, si Duterte-Carpio niawhag og paghiusa sa tanang mga Mandauehanon.
Iya sab nga gihangyo ang tanan sa pagsuporta sa kasamtangang administrasyon ni Mayor Luigi Quisumbing ug sa Konseho sa Dakbayan aron mapadayon ang mga nahimo niini alang sa Mandaue.
Ang amahan ug anak pulos gidapit sa mao nga kalihukan, diin si Duterte mikastigo og kasaba kang Cebu City Mayor Tomas Osmeña atol sa iyang pagpamulong.
Apan ang mayor niingon nga si Duterte gihatagan og di mao nga mga impormasyon.
Usa sa iyang gidudahan mao ang Police Regional Office (PRO) 7 ug si Presidential Assistant for the Visayas Michael Dino.