DAW nikilab ang panahon ug "ber" months na. Mabati nato ang kabugnaw sa hinuyuhoy sa hangin sa kabuntagon.
Sa mga batan-on gusto nila nga madali silang modako ug matigulang aron sila na pod ang hawod.
Sa mga edaran, gusto nilang mohinay ang dagan sa panahon aron dugay-dugay pa ang "last trip". Kung puwede pa lang mahunong ang edad buhaton kini ilabi na sa mga sapian kay lami man ang kinabuhi.
Apan sa kadaghanan nga wa mawad-i og paglaum, ang tanang katalagman pagsuway lamang gikan sa Kahitas-an. Bisan sa nagpungasi nga problema sa nasud, gikan sa bagyo, kapobrehon, kurapsiyon, druga, ug kriminalidad, nagpabilin gihapon ang paglaum nga moabot ang panahon nga molurang ra ang katalagman ug mopatigbabaw ang kalinaw ug kahamugaway sa kinabuhi sa mga yanong lungsuranon.
Karong bag-o, gibalita nga modeklara ang Malacanang og State of Calamity (SOCAL) sa nasud tungod sa problema sa kamahal sa batakang palaliton gikan sa bugas ngadto sa lana nga gigamit sa transportasyon.
Mahilig ang atong gobyerno og gamit sa pulong nga "state" sama sa State of the Nation Address (SONA), State of the City Address (SOCA), State of the Barangay Address (SOBA), State of the Province Address (SOPA), State of the Children Situation Address (SOCSA), State of Health Address (SOHA).
Ang plano sa SOCAL nagsugod sa kakulang sa suplay sa bugas sa National Food Authority tungod sa daghang rason.
Ang probinsiya sa Zamboanga maoy unang nideklara og SOCAL kay di na maantus ang kamahal sa commercial rice nga ang kadaghanan gikan pa sa smuggling.
Usa sa mga komedya ni DA Secretary Manny Piñol mao nga pag-ligalisa na rice smuggling sa back door aron maibsan ang problema sa kakulang sa bugas.
As usual, nahimo gidayon kining sumsuman sa kontra partido ug nanawagan nga mokanaug sa puwesto ang "garbo sa North Cotabato Province."
Gibatikos sab si tukayo nga nahitapatik sa mantalaan nga nikaon og NFA rice nga may bukbok nga gikan sa sinako nga bugas nga wala mahaw-as gikan sa barko.
Ang pagdeklara og SOCAL usa ka mekanismo sa gobyerno aron magamit ang iyang gigahin nga pundo alang sa pagsanta o pagtubag sa gideklarang katalagman.
Para kanako sakto lang nga magamit sa gobyerno ang pundo sa hinanaling panginahanglan sa katawhan.
Apan sa laing bahin, kinahanglang sutaon sa administrasyon ang tinubdan ug lintunganay sa problema nga maoy gamot hinungdan sa pagdeklara og SOCAL.
Unta lantawon sa gobyerno ang iyang food security and rice sufficiency program aron malikayan ang susamang problema sa umaabot.