DILI lang iyang pamilya apan gikasubo sa mga taga Kagay-anon ang kamatayon sa Olympian table tennis player nga si Ian o mas nailing si “Yan-Yan” Lariba human namatay niadtong Septiyembre 3, 2018 tungod sa Leukemia.
Diha sa social media, daghan sa Kagay-anon ang nag-post ug nag-share sa mga hulagway niini nga ilang gikonsiderang idolo sa natad sa table tennis ug nagdalag garbo sa siyudad isip labing sikat nga table tennis player sa tibuok kalibutan.
Ang inahan ni Yan-Yan nga si Mel, nibutyag nga sakit kaayo alang kanila ang pagkawala sa 23-anyos nga anak apan ilang gidawat ang hukom sa Labaw’ng Makagagahom ug gani iyang gisulti nga nakapasalamat na kini sa Ginoo uban sa pag-ampong bantayan ang iyang nabiyaan nga inahan ug igsuon.
Wala maagwanta ni Yan-Yan ang komplikasyon tungod sa inpeksyon human bag-o lang kini gipaubos og operasyon sa iyang ulo ug gibawian sa kinabuhi sulod sa St. Lukes Medical Center sa kaulohan.
Niadtong Mayo 2017, na-diagnose kini og acute myeloid leukemia.
Nag-edad pa lamang og 9 anyos si Yanyan nagtuon na kini og table tennis ug paborito niining lugar nga praktisan ang Sports Center.
Sa edad nga 10, ang coach niini nga si Noel Gonzales gikan sa Philippine national table tennis team nakadiskubre sa iyang kamaayo sa dula ug gidala na kini sa Palarong Pambansa.
Dinhi nagsugod ang iyang pagpartisipar sa kompetisyon sa probinsyal ngadto nasyunal.
Human lakip sa varsity team sa Corpus Christi School pagkolehiyo niini nagtuon kini sa De La Salle University diin nagkuha sa kursong Management in Financial Institutions.
Nahimo kining varsity player sa unibersidad ug nagdula sa UAAP Table tennis tournament.
Sa unang season niini, giila siya nga UAAP Season 74 Rookie of the Year ug UAAP Season 75 iyang team ang mikampiyon rason giilang Most Valuable Player (MVP).
Nangulo sab dayon kini sa kadaougan sa championship sa UAAP Season 77 ug giilang MVP ug labaw sa tanan giilang UAAP Athlete of the Year.
Naangkon gihapon niini ang kadaogan sa UAAP Season 78 ug laing MVP award ang nakuha. Athlete of the Year sab kini sa Season 78.
Tuig 2014 mirepresenta si Lariba sa international table tennis competitions diin siya maoy nangulo sa Philippine team ngadto sa first-place finish sa Division 4 atol sa 2014 World Table Tennis Team Championships nga gipahigayon sa Tokyo, Japan.
Miapil sab si Lariba sa 2015 Southeast Asian Games ug mi-qualified sa 2016 Summer Olympics pinaagi sa Asian qualification tournament nga gipahigayon sa Hong Kong niadtong April 2016.
Si Yan-Yan ang pinakaunang Pinay nga nga mi-qualify sa Summer Olympics.
Nagtraining kini sa South Korea pinaagi sa Korean coach nga si Kwon Mi Sook, usa sab sa mitabang kaniya sa pinansyal atol sa iyang pagkaospital.
Niadtong 2016 Summer Olympics, gibitbit ni Lariba ang bandila sa Pilipinas isip maoy delegation's flag-bearer atol sa opening ceremony.