HAPIT na makompleto ang paghawan sa mga telecommunication company sa ilang mga linya nga nangumbitay sa mga kadalanan.
Si Konsehal Jerry Guardo, chairman sa committee on infrastructure sa City Council kinsa maoy gitahasan ni Mayor Tomas Osmeña paghipos sa mga spaghetti wires niingon nga nahuman na sila og limpyo sa Osmeña boulevard, gikan sa Fuente Osmeña paingon sa City Central School.
Nahipos na usab nila ang mga dangling wire sa P. del Rosario paingon ngadto sa New Imus road ug padayon nga naglimpyo ang mga trabahante sa telco didto sa General Maxilom avenue.
Si Guardo nagkanayon nga prayoridad nila ang rota sa Sinulog sanglit upat nalang ka buwan ipahigayon na usab ang labing grandiyusong religious ug cultural activity nga mao ang Sinulog Festival sa dakbayan.
Gitug-an ni Guardo nga human sa Sinulog route, ila dayon nga isunod ang dalan Escario.
Human sa Escario, ang grupo sa mga telcos mopatighulog ngadto sa downtown area labi na sa dalan Colon, Leon Kilat ug ang sumpay sa Osmeña boulevard gikan sa intersection sa N. Bacalso dayon mopaingon na usab sa uptown area.
Si Guardo nagkanayon nga ilang gihingusgan mao nga malimpyo ang tanang spaghetti wires inig abot sa ika-500 ka tuig nga kasaulogan sa pagtaak ni Ferdinand Magellan sa Pilipinas karong 2021 diin iyang gitisok ang Kristiyanismo nga karong gisunod sa mga Pilipino. PAC