“Sa politika, ang 'buhay ay weather weather lang'.”
NAHIMUTANG sa ikatulo nga dapit si Davao City Mayor Sara Duterte-Carpio sa mga gihimbisan sa katawhan sa tibuok nasud nga piliunon pagka-senador sa umaabot nga eleksiyon sa 2019.
Apan kanunay sab madungog ang iyang pagbalibad nga wala siyay interes nga mga senador kay mas tutokan niya ang iyang pagserbisyo sa dakbayan sa Davao.
Kanunay hinuon nagatuyok sa tibuok nasud si Mayor Inday sa pagpanumpa sa mga politiko, apil ang mga nagsugod pagbiya sa ilang political party aron motapon sa bag-ong partido nga “Hugpong ng Pagbabago” nga iyang gipangunahan sa pagtukod.
Bisan ang mga opisyal sa barangay nga unta non-partisan wa magpaulahi, mikuyog sa sulog sa Hugpong ng Pagbabago.
Daw usa ka balloon nga gihuypan og hangin midako la'g kalit, pinaabtik, matud sa mga bagets, ug mosabak na sa national election ang maong partido uban sa ilang mga kandidato pagka-senador nga ginatiboy sa umaabot nga mid- term election.
Tataw nga si Mayor Inday Sara maoy ginatan-aw sa mga politiko sa nasud karon tungod sa iyang maayo nga record sa pagka-mayor labi na nga humot karon sa katawhan ang bansagon nga Duterte.
Daw sama sa usa ka punoan sa balite ang Hugpong ng Pagbabago kay posible nga mao kini ang political party sa sunod nga pangulo sa nasud.
Kon hugot nga balibaran ni Mayor Inday ang katawhan nga gustong mahimo siya nga senador sa 2019 election, mobalibad kaha siya kon ang katawhan gusto nga ipadayon ang serbisyo sa Duterte sa Malacañang sa 2022?
Mao kini ang sitwasiyon nga buot alkontrahan sa mga kalaban sa politika nga buot bawion ang lingkuranan sa Malacañang diin sila nahimong haruhay pa sa mga binulahan.
Sa natad sa politika sa Pinas, daghan ang abtik moabandona sa ilang partido pamasin nga madala sila sa kadaugan sa mga kusgan. Sa politika, ang “buhay ay weather weather lang.”