GIHUPAY sa mga awtoridad ang publiko bahin sa hulga sa pagpamomba nga mikatag sa “online” human sa pagpamomba sa kasikbit nga probinsiya sa Sultan Kudarat niadtong milabay nga semana, ug nagbahad sa mga naghimo nga lutuson tungod kay nakamugna og kalisang ug kahadlok.
Si Police Senior Superintendent Alexander Tagum, Davao City Police Office (DCPO) director, mibahad batok sa mga indibiduwal kinsa misakay sa kasamtangang sitwasiyon sa seguridad pinaagi sa pagpakatap og sayop nga impormasyon sa “online” bahin sa posible nga mga target nga bombahan.
“Terrorism is a psychological warfare. Terrorist try to manipulate us and change our behavior by creating fear, uncertainty and division of society,” bahad ni Tagum.
Dugang pa niya, “Do not support terrorism by spreading false bomb alarm/joke. We will seek you out and arrest you.”
Gitumbok ni Tagum ang mga mensahe sa online nga gipakatap sama sa hulga sa pagpamomba sa mga dakbayan sa Davao, Tagum, ug Panabo.
“Let us advise our people not to be scared by these series of Bomb Scare. The intention of Terrorism is precisely what is happening now to most of our people- to scare them in a way that simply walking out in the streets is becoming impossible. We must together fight Terrorism by showing them that we are not afraid and that we will fight them when they enter our beloved City. Fight them with our vigilance and common resolve that we will not be cowed,” hagit sa opisyal sa pulis.
Gipasalig sa mga tinugyanan sa balaod ngadto sa publiko nga wala sila milugak sa pagbantay ug kanunay sila nga naa sa “full alert” aron pakgangon ang bisan unsang kasamok aron nga maseguro ang kaluwasan ug seguridad sa Dabawenyos.
Samtang si Talomo Police Station commander Police Chief Inspector Ronald Lao nagkompirma kagahapon nga niadtong Martes ang Malayan Colleges of Mindanao nakadawat og “bomb threat” gikan sa wala mailhing tawo mga 10:30 sa buntag hinungdan nga tagdumala sa tulunghaan nanawag sa mga awtoridad aron nga masusi ang maong hulga.
Nagpadala gilayon sa lugar og K9 unit, Central 911 ug Explosive Ordnance Division aron nga maseguro nga maprotektahan ang mga tinun-an.