WA pa gani masulbad ang pagbanhig patay kang Ronda Vice Mayor Jonah John Ungab niadtong Pebrero, gipusil patay na usab ang ilang mayor nga si Mariano Blanco III sulod mismo sa iyang buhatan ala 1:30 kagahapon sa kaadlawon.
Anggulo sa drugas ug pulitika ang nag-unang duha ka mga motibo nga gitan-aw karon sa kapulisan.
Si Blanco nalakip sa listahan sa mga narco politician ni Presidente Rodrigo Duterte niadtong 2016.
Sukad siya ginganlan ni Duterte, si Blanco naa na magkatulganan sa lawak sa iyang opisina isip kabahin sa iyang seguridad.
Upat ka wa mailhing lalake nga nagtaptap ug sakay sa usa ka puti nga van ang gitumbok nga killers.
Pag-abot sa killers, diretso kining nanion sa duha ka mga job order watchman ug gipahapa sila.
Nisaka kini sa ikaduhang andana sa munisipyo agi sa hagdanan sa likod sa munisipyo, mga 10 metros lang gikan sa police station.
Gihulagway sa mga watchman nga Tagalog ang pinulongan sa mga killer.
“Sumala sa atong mga witness katong duha ka watchman, nga upat ka tawo ang nakita nga nagpadulong sa ilaha, miingon nga “dapa.” Tagalog ang estorya,” matod ni SPO1 Dionesio Tagopa, imbestigador.
Pipila ka gutlo ang milabay, mga buto sa armas ang ilang nadungog.
Human niini, yanong nanganaog ang mga killer ug nibalik pagsakay sa nag-atang nang van sa atubangan sa munisipyo.
Mga pulis nga nadestino sa Ronda police station giingong wa makadungog sa mga sipang buto sa armas tungod kay nag-uwan, matod ni police chief Jay R. Palcon.
Matod ni Tagopa nga sa dihang nakabiya na ang mga killer, ang duha ka mga kawani ningsusi sa opisina sa mayor.
Ilang nakaplagan si Blanco nga nagkadugo na.
Dali nilang gipahibawo ang police station nga gipusil ang mayor.
Patay na pag-abot ni Blanco sa Barili District Hospital.
Giangkon ni Tagopa nga wa dayon makaresponde ang mga pulis tungod kay nag serve og warrant of arrest sa usa ka kriminal sa ilang lungsod uban kang Palcon.
Matod ni Tagopa nga sa iyang nakita sa crime scene, kasagaran nga igo naa sa lawas ug bukton.
Si Blanco natulog niadtong higayuna.
Nagbangutan
Si Bise Mayor Rocky Gabatan, first councilor nga nihulip kang Ungab, niingon nga ang kamatayon ni Blanco nakapahimong magul-anan sa ilang tinuig nga kapistahan ning semanaha.
Mga kawani sa munisipyo, konsehal ug si Gabata nanagbutang og itom nga ribbon sa ilang wala nga bukton pagpadayag sa ilang kasub-anan.
Half mast usab ang bandila gawas sa munisipyo.
Ilang gikanselar kagabii ang ilang opening salvo sa kapistahan.
“Kalit kaayo ang hitabo. Unya, maghisgot tag Mayor Nonie, suod ko kaayo,” siya niingon sa wa pa mohilak. “Nasubo kaayo ko.”
Siya nangulo sa konseho sa usa ka emergency session mga ala 1:30 sa hapon kagahapon aron pag-aprobar sa usa ka resolusyon sa paspas nga imbestigasyon ug pagkondenar sa pagpatay.
Ang Kapitolyo ug ang League of Municipalities in the Philippines (LMP) Cebu Chapter nikondenar sa pagpatay.
Si Gobernador Hilario Davide III niawhag usab sa National Bureau of Investigation nga mosulod sa imbestigasyon.
Hugot nga gikondenar ni Davide III ang pagpatay kang Blanco, kinsa iyang giila nga higala ug kaalyado niya sa politika.
Matod ni Davide nga nisulti kaniya si Blanco nga nakadawat siya og taho nga siya ang isunod kang Ungab.
Nakugang si Davide human niya mahibaw-i ang hitabo.
Gikasubo usab ni Lapu-Lapu City Mayor Paz Radaza ang kamatayon ni Blanco.
“Og naay ingon aning patay makig-istorya man gyud ko sa akong mga pulis, because I like them to explain ngari sa akoa unsa ang situation at least para kun makig-istorya ko sa laing tawo I know where I stand sa situation,” nagkanayon si Radaza.
Si Mandaue City Mayor Luigi Quisumbing, sa iyang bahin, niingon nga daghan ang posibleng mga motibo.
“I hear there have been many different theories, everything from politics, to business, to drugs. and that just goes to show sometimes convoluted gyud ang mga motives sa mga incidents such as this ,” matod sa mayor.
Motibo
Nimando si Cebu Provincial Police Director Manuel Abrugena sa pag-umol og special investigation task group alang sa dinalian nga pagsulbad sa kamatayon sa mayor.
Duha ka mga anggulo ang gipatutokan karon ni Abrugena.
Kini mao ang giingong kalambigitan ni Blanco sa ilegal nga drugas human nganli ni Duterte nga nalakip kini sa listahan sa mga narco politician.
Wa usab nila wad-a ang posibling may labot ang politika human ang mayor maoy usa sa mga gidudahan nga nagpapatay ni Ungab.
Apan si Blanco nanghimakak na niini kay siya mismo gani ang naggiya sa political career sa iyang pag-umangkon.
Di una
Ang pagpatay sa mayor ug bise mayor sa usa ka dapit tungod sa kalambigitan sa illegal drugs sukad si Duterte nangatungdanan di una.
Ang mayor ug bise mayor sa lungsod sa Datu Saudi Ampatuan gipamusil patay usab sa managlahing mga higayon.
Sila si anhing mayor Samsudin Dimaukon ug anhing bise mayor Anwar Sindatuk namatay sa sa managlahing mga higayon.
Si Sindatuk ginganlan ni Duterte nga narco politician. Dugang taho nila ni FVQ, JPP, Deborah Taneo, USJ-R Intern