MAY rason nga si Daanbantayan Mayor Vicente Loot wa na mo-report ug magpakita sa iyang municipal hall gumikan sa hulga sa iyang kinabuhi human siya hinganli ni Presidente Rodrigo Duterte nga nahilambigit sa ilegal nga drugas. Matod pa, nag-opisina si Loot sa usa ka wa matino nga lugar gumikan sa kabalaka sa iyang kinabuhi. Gisuwayan na siya sa pag-ambush uban sa iyang pamilya, apan wa makuha.
Nganong nakaingon ko nga may rason si Loot? Gumikan kay dili siya luwas. Sumala og unsay nahitabo ni Mayor Mariano Blanco sa Ronda? Niadtong miaging kadlawon, gisulong sa armadong mga tawo ang munisipyo diin magpuyo si Blanco ug gipusil patay. Si Blanco dugay nang nagpuyo sa iyang opisina sa munisipyo human misibaw ang iyang ngalan sa kalambigitan sa illegal drugs.
Nagtuo siya nga luwas na siya sa maong lugar. Apan dili diay gihapon. Mga upat ka armadong tawo nga sakay sa puti nga van ang kalit nisulong sa munisipyo ug dayon gipahapa ang mga watchmen dayon sulod sa lawak nga gi-estahan ni Blanco. Paka-paka ang mga buto sa armas de fuego. Patay nga nidangat sa Barili District Hospital si Blanco.
Ang nakaparat kay ang police station sa maong lungsod naa ra sa compound sa munisipyo. Puwede rang tuthuan. Apan wa maka-react ang nga pulis. Matod pang Sr. Inspector Jay R Palcon, hepe sa kapulisan, nga gamay ra ang personnel nga naka-duty niadtong tungura gumikan kay nag-serve og warrant ang ubang personnnel ug nagpatrolya usab ang uban gumikan sa nagsingabot nga pista. Naka-hot pursuit kuno sila apan wala na nila maapsi ang van. Paet.
Unsa-on paggukod kon adunay sabot? Dako ang akong pagtuo nga mga ahente sa gobiyerno ang nagbira kang Blanco.Ang pagpatay kaniya way kalainan sa mga pagpamatay sa ubang mga pulitiko nga nahilambigit sa illegal nga drugas. Apan gisusi usab ang anggulo sa pulitika. Si Ronda Vice Mayor Atty. Jonah John Ungab, kinsa pag-umangkon ni Blanco, gipusil-patay niadtong Pebrero. Si Ungab abogado ni self-confessed druglord Kerwin Espinosa. Ako nagtuo nga duna pa gyuy isunod ani. Mao nga gilubat-lubatan na si Loot ani kay kanunay ra ba siyang hinganlan sa Presidente.