MAS gikahinaman karon sa mga moapil sa Samal 50 Ultra Trail Run ang bag-o ug mas lisud nga rota nga agian sa umaabot nga Oktubre 13 ug 14 sa Casa Estrella Beach Camp bahin sa Island Garden City of Samal (Igacos).
Kini ang pahayag ni Organizer Karla Degrano atol sa Davao Sportswriter Association (DSA) Forum sa 2nd floor, SM City Davao adlaw’ng Huwebes, Septyembre 6.
“Mas extreme karon ug mas lisud. Ginalain-lain namo among trail every year para ma-promote ug masuroy ang Samal. Karon kay sagol, 80 porsiyento trail ug 20 agian semento.”
Dugang ni Degrano nga gilaumang moabot sa 200 ang mopartisipar nga gikan sa Bukidnon, Panabo, Manila, Cebu ug Davao diin gilimitan lang nila kini sa maong ihap.
“Gisakto lang namo kay para di madaut ang nature didto, kung daghan na moapil.”
Dunay duha ka kategorya sa dagan nga 22K ug 50K sa lalaki ug babaye nga dibisyon nga may cut-off time nga 9 oras ug 14 oras sa maong han-ay sa lumba dagan nga gi-organisa sa Base camp ug Bagani Active Gear.
Ang 22K magagikan ug mahuman sa maong Beach Camp nga sugdan sa alas 3 sa kaadlawon samtang ang 50K magsugod sa Barangay Balet hangtud sa Casa Estrella.
Gipahayag sab ni Karla nga ang mga modaug sa duha ka dibisyon makadawat og medalya.
Sa mga interesado, ang rehistrasyon mobalor og P1,700 sa 22K ug P2,200 sa 50k lakip na ang racevest, racebib, finisher's medal ug post-race meal ug duna say promo nga 10+1.
Ang mga moapil kinahanglang dunay “mandatory gears” nga selpon (fully charged w/load), head lamp, whistle, first aid kit, personal medication, trail food, water carrier ug lights jackets samtang madugang ang medical certificate sa 50K.
Mamahimong magpalista sa online sa Samal 50 Facebook Page o sa opisina sa Base Camp nga anaa sa Red Cross Building, ground floor sa dalang Roxas sa Davao City. (MRP)