HAGONOY, Davao del Sur -- Mitugpa sa tambalanan ang usa ka 4-anyos nga babaye human gilugos sa 28-anyos nga sinaligan sa Barangay Guihing.
Napusgay ang kaugmaon sa batang si alyas Baby, human gipanamastamasan sa suspek nga si Roger Alquiza, kauban sa boarding house nga ilang gipuy-an.
Sumala ni Police Officer 1 Rasheka Sajile, assistant investigator sa Women and Child Protection Desk (WCPD), nga gibilin sa inahan ang bata ngadto sa suspek kay apason niini ang amahan nga nagdula og “dota” sa internet cafe.
Wa magdahom ang inahan nga sa ilang pagbalik maaktuhan niini ang gihimo sa suspek ngadto sa bata.
“Nagkadugo na ang lubot ug pribadong parte sa bata unya naa pa jud sakit ang bata,” asoy ni Sajile.
Gihulagway nga lango sa ilimnong makahubog ang suspek dihang gihimo ang linuog nga krimen.
Matud ni Sajile, adunay mga kasong kawat ang suspek sa probinsiya sa Sarangani sanglit wa kini klarong pinuy-anan.
Human nangayo og tabang ang ginikanan sa bata, gitabangan og kulata sa mga silingan ang suspek.
Samtang ang bata gidala ngadto sa Southern Philippine Medical Center sa Davao City.
Gikustodiya na sa kapulisan ang suspek samtang gihikay ang kasong ipasaka batok kaniya.
Nagpasidaan ang kapulisan ngadto sa mga ginikanan nga di isalig ang ilang mga babaye’ng anak sa bisan kinsa lang.