DAKONG kasaulogan ang himoon sa mga Katoliko ugmang adlawa kay kini ang gigahin alang sa paghinumdom sa adlawng natawhan ni Mama Mary. Gipaabot nga magdasok ang mga deboto sa mga shrine mga simbahan nga gipahinungod sa Balaang Inahan. Happy birthday, Mama Mary!
• • •
Ugma na usab ang konserto sa Bootleg Beatles nga giatangan sa mga seniors nga mokatol ang mga tiil ug maka-indak-indak dayon kon makadungog sa mga kanta sa The Beatles. Adto sa IC3 himoon ang pasundayag. Kitakits!
• • •
Human sa gihimong premier night sa pelikulang The Hows of Us nga gitambongan nila ni Kathryn Bernardo ug Daniel Padilla, duna na say laing pelikula nga nag-premiere sa Cebu.
Kini mao ang Goyo - Ang Batang Heneral nga mahitungod sa nahimo ni Gregorio del Pilar panahon sa pakigbisog alang sa kagawasan batok sa mga Amerikano.
Ang premiere gitambongan nila ni Paulo Avelino isip Goyo, Carlo Aquino, Mon Confiado, Empress Schuck, Gwen Zamora, Stephanie Mae Sol, Rafa Siguion-Reyna, Jason Dewey ug ang direktor nga si Jerrold Tarog.
Niangkon si Jerrold nga importante alang niya ang Cebu kay dinhi kuno nagsugod ang iyang career isip direktor.
Bisan diay sa panahon sa gubat, may heartthrob ug kilig moments gihapon. Mag-ilogay ang mga dalaga pagpaduol ug pagdapit sa pagtagad ni Goyo.
• • •
Mismo si Alden Richards nakadayeg sa gihimo sa teleserye nga FPJ’s Ang Probinsyano sa ABS-CBN nga pagtabang sa mga artista nga wala nay trabaho aron makabalik sa pag-arte.
Dinhi sa Cebu si Alden kuyog nila ni Janine Gutierrez, Andrea Torres ug Pancho Magno aron mahimamat ang ilang mga magdadayeg nga way puas ang pagsuporta sa teleserye nila nga Victor Magtanggol.
Sanglit gihatagan silag katungod sa GMA-7 nga makasugyot aron mapanindot ang teleserye, plano ni Alden nga sundon ang gibuhat sa teleserye sa kaatbang nga network nga pagtabang sa isig ka artista.
Way seguro nga mokalit lag lugwa sa teleserye si Maine Mendoza. Matod pa ni Alden nga duna pay kaugmaon ang AlDub nila ni Maine.
Sa ato pa, posibleng magkauban silang duha sa usa ka proyekto, posible nga dinhi sa Victor Magtanggol, laing teleserye o sa usa ba ka pelikula. Nindot kining balitaa labina sa mga magdadayeg sa AlDub nga wa pa kawad-i sa paglaum.