GIHANGYO ang tanang barangay sa dakbayan sa Mandaue nga ilainlain ang mga basura usa kolektahon ug ilabay sa labayanan.
Gawas niini, ang Mandaue City Environment and Natural Resources Office (MCENRO) mopatuman og schedule kon kanus-a mahimong makalabay ang mga barangay sa ilang mga residual nga basura didto sa Guun Plastic Recycling Facility sa lungsod sa Consolacion.
“Ang main objective ani is para makaila gyud ang mga tawo unsa nga basura ang residual kay mao ra man na ang dawaton ngadto sa Guun,” matod ni Archt. Aracelli Barlam, pangu sa MCENRO sa dihang nahinabi sa Superbalita Cebu.
Paambit niya nga gipatuman ang schedule sa iyang buhatan tungod kay limitado ra ang budget sa dakbayan sanglit sa matag tonilada nga basura nga ilabay ngadto sa pasilidad sa Consolacion, aduna kini bayad.
Di mominos sa P10 milyones ang gitaganang pundo sa MCENRO sa paglabay og residual waste sa 27 ka barangay sa Mandaue didto sa Consolacion alang sa sunod nga upat ka buwan.
Ubos sa bag-ong lakang sa pagpangolekta og paglabay og basura, ang 27 ka barangay gigrupo og katulo ug gihatagan og schedule sa ilang paglabay didto sa Consolacion.
Nagsugod og labay sa ilang mga residual waste ang Batch 1 nga gilangkuban sa mga barangay sa Subangdaku, buhatan sa General Services, Canduman, Paknaan, Pagsabungan, Casili, Ibabao-Estancia, Guizo, Mantuyong ug Banilad kagahapon.
Ang Batch 2 gilangkuban sa mga barangay sa Looc, Opao, Bakilid, Basak, Cambaro, Cubacub, Tipolo, Centro, Tabok ug DGS samtang Batch 3 ang Umapad, Tingub, Labogon, Maguikay, Tawason, ALang-alang, Cabancalan, Casuntingan, Jagobiao, ug DGS.
Nanghinaot si Barlam nga tungod sa ilang lakang, ma-edukar ang mga barangay kalabot sa paglain-lain sa mga basura.
“Dako gyud kaayo nga problema ang waste segregation sa Mandaue tungod kay behavioural man gud siya nga issue. Di siya ingon ana kadali ma-solve. Pero we’re trying our best although not all, naa pud mga barangays nga nag-segregate. Although di ta consistent ana, pero naay barangays naningkamot,” saysay ni Barlam sa Superbalita Cebu.
Sa maong lakang, mapugos og lainlain sa basura ang mga barangay tungod kay kong wa gilainlaing ang basura daan, di man kini dawaton sa pasilidad ug kon sila molabay sa Umapad Dumpsite, aduna mabayran, matod ni Barlam. JPP