ANG first councilor nga si Rocky Gabatan, kinsa mao ang nihulip sa anhing bise mayor sa lungsod sa Ronda nga si Atty. Jonah John Ungab, mao na karon ang mayor sa lungsod.
Matod sa Department of Interior and Local Government (DILG) 7 nga di na kinahanglan ang directive gikan kanila aron molingkod si Gabatan isip mayor basta nakapanumpa na siya.
Matod ni DILG 7 Assistant Regional Director Ma. Loisella Lucino, si Gabatan ang mohulip sa nabakante nga posisyon sa napatay nga si Ronda Mayor Mariano Blanco III.
Apan konsultahon pa sa DILG 7 ang ilang ulohang buhatan kon kinsa ang mohulip isip bise mayor human ang 2nd councilor sa lungsod nga si Jay-Ann Cañete mi-resign ug mitrabaho sa laing nasod.
Gisundan kini ni 3rd Councilor Harold James Llego.
“Importante gyud sa process is the party nomination unya ang endorsement/certification should be signed by the highest ranking political nga ilang officer of the party,” si Lucino kinsa nipasabot kon kinsa’y mohulip sa mga nabakante nga pwesto sa konseho.
Aron masweldohan ang mga empleyado sa munisipyo sa Ronda ug dunay magasto sa umaabot nga festival karong semanaha, niasumir isip bag-ong mayor si Gabatan.
Nilingkod usab isip bise mayor ang ikatulong konsehal sa lungsod nga si Llego.
Matod ni Gabatan, nanumpa sila atubangan ni Poblacion Barangay Kapitan Jalane Ogario alas 5:00 sa hapon niadtong Miyerkules aron makaasumir sa ilang bag-ong pwesto. HBL, SCG