SA IKA-DUHANG higayon nasakmit sa siyudad sa Cagayan de Oro ang “Seal of Good Education Governance” atol sa ika-12 nga Washington Sycip National Education Summit niadtong Septiyembre 6, 2018 sa Kaulohan.
Gipahigayon ang awarding sa Philippine International Convention Center (PICC), Pasay City ug gidawat ni Mayor Oscar Moreno ug Vice Mayor Raineir Joaquin Uy, kauban ang membro sa City council ug Local School Board sa Committee on Education ni City Councilor Suzette Magtajas-Daba ug department heads.
Sa Facebook page ni Moreno, gibutyag niini nga ang maong award alang sa mga Kagay-anon ug nagpasalamat kini sa Local School Board sa ilang mga pagpaningkamot.
“We got it again! The most coveted Seal of Good Education Governance from the Synergeia Foundation,para kaninyo kini mga Kagay-anons!” pahayag niini.
Kining tanan tungod sa ka epektibo sa lokal nga kagamhanan pag-organisar sa mga sistema lakip na proseso matunol ang edukasiyon ngadto sa katawhan aron nga makab-ot sa kabataan ang ilang mga pangandoy.
Nakadawat ang siyudad isip insentibo gikan sa PLDT/Smart telecommunication company og P1.5 million nga communication packages lakip na usab P100,000 nga oil gikan sa Sea Oil; playground equipment gikan sa SGV ug libro gikan sa Jesse Robredo Foundation.
Gihingusgan ug gihatagan og dakong pagtagad sa adminsitrasiyon ni Moreno ang edukasiyon diin sukad sa paglingkod niini niadtong tuig 2013 aduna na kini 600 nga mga lawak saringan nga napatukod aron matubag ang panginahanglanon ilabi na ang kakulangon sa mga classroom.