GIDUMOG sa mabagang duot sa mga tawo ang pagpauli ni Margielyn Didal sa Sugbo human niya sakmita ang gold medal sa event nga street skateboarding alang sa bag-ohay nga natapos nga 2018 Asian Games didto sa Indonesia.
Makabungog nga abiba ang nisugat niya gikan sa mga ginikanan ug tinun-an sa Lahug Elementary School diin siya nagtungha kaniadto. Taliwala ning maong kalamposon may mga masaaron nga pagbati ang nagpahipi. Kini nagagikan sa iyang mga kaubanang skater nga sakop sa Cebu Skateboarding Association.
“Lipay kaayo ang skate community sa Sugbo, proud kaayo ni Margielyn. Dako kaayo og impact kay naa bayay history nga bati kaayo ang panan-aw sa mga skater. Discriminated kaayo. Pirme lang bugawon, pahawaon ug di pasudlon sa mall.
Nausab gyud ni Margie ang image sa mga skater. Kaniadto sige mi og propose nga magtukod og skate park, finally duna nay kaugmaran kay giuyonan na ang maong plano,” matod ni Peter Lindgreen ang spokesperson sa maong kahugpongan.
Si Peter nga taga Labangon, Cebu City ug usa ka home based virtual assistant nitug-an nga ang ilang kahugpongan duna nay subra sa lima ka libo ang miyembro. Ang dakong problema kay way skate park nga ka bansay bansayan mao makita nato sila nga naa sa mga sidewalk ug karsada nagbahas bahas. Bisan si Margielyn nipadayag sa iyang personal nga mga kasinatian labot sa mga kahasol nga iyang naagian.
Apan wa kini makatarog sa iyang determinasyon paglangkat og gold medal nga nakapausab sa dagan sa maong paugnat sa kusog.
Kadto pa lang untang paglandig niya da ikawalo nga dapit sa Street League Skateboarding Pro Open London Women’s Qualifier niadtong Mayo 26 sa London, United Kingdom ug ang iyang pagsalmot sa X-Games sa Estados Unidos igo na nga basihanan nga hangpon sa atong kadagkuan ang Skateboarding ug suportahan ang kawsa sa mga skaters.
• • •
Sa among pagbaylo-ay og text message si Peter niingon nga positibo siya nga di makawang ang kalamposan ni Margie. Iyang gitug-an nga nagka estoryahanay na sila ni Mayor Tommy sa pagatukoron nga skate park.
Apil ang iyang grupo sa pagkulit sa desinyo ug ubang pasilidad nga tukoron sud sa maong skate park.
Iya sab nga gihangop ang akong obserbasyon pagdasig sa ubang city hall ug munisipyo pagtukod og skate park sa ilang dapit. Siya niingon nga andam sila nga motabang pag-umol sa desinyo. Nalantawan nga daghan na unyang mga batan-on ang mopadayag og interes sa skateboarding niingon si Peter.
Pangandoy nila nga masukip kini sa korikulom sa mga tunghaan isip kabahin sa subject nga Physical Education.