KINI bitaw’ng ingnon ka ‘buhi-i kung di para imo’ sayon ra kaayo i-litok apan sa tinuod lang, sarang lisuda buhaton labi na kung nakagamot na ang relasyon.
Ang pangutana, nganong ipanghimugos man ang kaugalingon kung way klarong pagtagad, pag-amuma o pagbati gikan sa hingtundan?
Bisag usa pa ka bukid ang mga pasangil aron lang makalusot sa mga daghang pangutana nganong wa mo molahutay, moguwa gihapon ang kamatu-oran sa ngadto-ngadto nga wa siya magka gusto nimo. Ingon ini ra simpli ang rason, period!
Di ikalimod nga sukad pa sa una, dakong hagit para sa mga lalaki ang mangunay ug maninguha pagpanguyab, gukod, og ilog sa kasing-kasing sa ilang na-ibgan.
Maong kitang mga babaye angay modawat sa kamatu-oran nga kung ang lalaki wa magka gusto, mangita gayod kini og rason ug paagi nga maka-ikyas ug magpalayo. Rason sama sa busy o dagha’g gi-trabaho, personal nga problema, dagha’g sugo si boss ug uban pa aron lang maka-ipsot og makapadayon sa laing tumong labi na kung dunay bag-ong gikalingawan.
Sakit man sa buot, apan kamatu-oran nga kasagarang mga lalaki simpli ra og panghuna-huna kung maghisgot og relasyon. Di na angay lugit-lugiton pa sa pagpangutana kung unsay sulod sa ilang huna-huna ug dughan kay mo prangka man kini og padayag, sa masakitan ka o dili.
Busa ayaw usiki imong panahon paghuna-huna ug pag-analisar sa sitwasyon. Buhi-i gilayon kay tataw kaayo nga di siya interesado nimo. Ang importante, wa kay gipasakitan o nagpakasala.
Hinay-hinaya og biya ug ilubong sa kalimot aron ka maka-irog kay segurado ko nga naay laing gitagana atong Magbubuhat para nimo.
Ang lalaking dunay tinuoray nga pagbati sa imo maningkamot og mangita og paagi kada adlaw nga makapadayag sa iyang gugma ug gusto nga maka-uban ka kanunay. Di kini magduha-duha og tubag sa imong mga tawag, mo dayeg ug motabang para makakab-ot nimo imong ambisyon, di magmakuli paggunit sa imong kamot ug halok bisag naa sa publiko. Di sab kini moduwa sa imong emosyon og di ka pahilakon.