ADUNA nay persons of interest ang giumol nga Special Investigation Task Group nga nag imbestigar sa pagpusil patay ni Ronda Mayor Mariano Blanco III nga posibling adunay kalambigitan sa krimen.
Anggulo sa politika ug personal ang gitan-aw na karon sa kapulisan lakip na ang drugas.
Wa lang una nganli ni Senior Superindent Manuel Abrugena kon kinsa sanglit dili pa sila matawag nga suspek samtang wa pa silay ebidensya nga makatumbok kanila nga sila ang naghimo sa krimen.
Giklaro niya nga ang maong personalidad nga posibling adunay kalabotan sa pagkamatay sa mayor giingong kanhi niya mga sakop nga gihimo usab niya nga hitman sa iyang illegal nga kalihukan.
“It is an open secret in Ronda na ito pong mayor is known to be taking care or ng mga taong with masasabi po natin na may questionable character,” matod ni Abrugena.
Tulo ka mga anggulo na ang ilang gisubay sa pagkakaron.
Kini naglangkob sa politika, personal ug ang may kalabutan sa illegal nga drugas tungod sa paghingan kaniya ni President Rodrigo Duterte.
Apan gipasabot ni Abrugena nga sa pagkakaron ila una nga tan-awon kining politika ug personal sanglit adunay mga impormasyon nga ilang nasagap nga ang mayor ang gibasol sa kamatayon ni Vice Mayor Jonah John Ungab niadtong Pebrero. AYB, SCG