GIHAP-AN sa pulis ang granada aron dili na makaangin og uban pa nga mga tawo sa palibot hinungdan sa iyang kamatayon mga alas 11:30 sa buntag sulod sa Initao College, Barangay Jampason lungsod sa Initao, Misamis Oriental.
Gituohang wala nay pin nga gidaladala nga granada sa usa ka senior citizen kinsa unang mag-amok sa dapit.
Patay si Police Master Sergeant Jason Magno sulod sa tambalanan diin kini daling gidala.
Samtang patay usab ang suspetsado nga nailang si Ebrahim Ampaso Basher, 65, residente sa Madamba, Lanao Del Sur.
Sa inisyal nga imbestigasyon sa Initao Police Station, giingong gikan si Basher sa buhatan sa Department of Environment and Natural Resources (DENR) nga duol lamang sa tunghaan.
Giingong naglasong kini gikan sa maong buhatan paingon sa tunghaan human nadakpan ang mga falcata nga gipanag-iyahan niini.
Didto palang daan sa DENR gitangtang na niini ang pin hinungdan lakip sa trabahante nangdagan.
Nagbahad kini nga labayon sa granada ang buhatan apan niabot kini sa eskwelahan.
Gumikan sa iyang pag-amok, nagpatabang ang mga personahe sa tunghaan ngadto sa kapolisan ug girespondihan.
Gisuwayan pag-pin down ni Magno ang suspek apan dihang napahigda na niini kalit nga mibuto ang granada nga wala na diay kini pin adtong tungora.
Ang suspek nga nahulog sa kilid sa covered court ang gipusil pa sa laing pulis hinungdan sa iyang kamatayon.
Samtang samdan usab si Police Master Sergeant Alice Balido kinsa gidala sa pribadong balay tambalanan ning siyudad sa Cagayan de Oro.
Adunay napulo ka samdan nga mga tinun-an kon diin usa kanila ang grabe.
Mga samaran anaa gidala sa Misamis Oriental Provincial Hospital sa Initao.
Si Police Regional Office 10 Regional Director Rolando Anduyan niingon nga padayon pa ang imbestigasyon ug gidayeg ang kaisog ni Magno sa pag-pin down sa suspek.
“During the confrontation, the suspect throw the grenade, prompting PMSG Magno to attempt to shield other would be victims using his own body, while his partner PMSG Balido manage to shoot back neutralizing the suspect and for inflicting further harm,” sa report nga gipagawas ni RD Anduyan ug nisulti nga i-ampo ang mga biktima nga samdan.