PADAYON ang paghakot ni Efren “Bata” Reyes og mga dolyares human niya nakuha ang Master of the Table Crown sa 12th Annual Derby City Classic sa miaging adlaw sa Horseshoe Casino and Hotel sa Indiana, USA.
Kini maoy ikalimang Master of the Table Crown alang sa gitawag og “The Magician”, kinsa girekognisar nga usa sa labing maayong bilyarista sa tanang panahon. Nidaog sab si Reyes niini niadtong 1999, 2004, 2005 ug 2007.
Karong tuiga, si Reyes nahimong finalist sa 9-Ball Banks unya mikampiyon siya sa 9-Ball Competition hasta sa Fat Boy 10-Ball Challenge.
Igo na kaayo kini aron maangkon niya ang All Around The Master of the Table Crown.
Human sa 10 ka mga adlaw nga aksyon, si Reyes nakatigom og $47,500 nga kinatibuk-ang ganti.
Nakabulsa siya’g $20,000 isip All-Around champion, $16,000 isip hari sa 9-Ball event, $5,000 isip runner-up sa 9-Ball Banks, ug laing $6,500 isip kampiyon sa Fat Boy 10-Ball Challenge.
Ang ubang mga Pinoy nga ningsalmot sa kompetisyon mao sila si Francisco “Django” Bustamante, Alex “The Lion” Pagulayan, ug veteran internationalists Rodolfo “Boy Samson” Luat.
Si Bustamante, 2008 All Around champion, nisakmit lang sa 3rd overall sa One Pocket division karong tuiga.