“NGENI sasabyan ku kekayu iti, kapatad,
a ing laman at daya e na amana ing kayaryan ning Dyos;
anti mu rin ing malalaso e na amana ing e malalaso.”
~Mumunang Korintaynu, Dangka 15: Sunis 50
(1 Corinthians 15:50)
“Kabang e tamu lalawen ding bage e mayayakit,
dapot karing bage a e mayayakit:
uling ding bage mayayakit pangsaguli la mu;
dapot ding bage e mayayakit pang-alang angga la.”
~Kadwang Korintyanu, Dangka 4: Sunis 18
(2 Corinthians 4:18)
“Inya sa’t manalig kami, neng balu mi,
a kabang ati keng magbale king katawan, ala kami king Ginu:
(Uling lalakad kami kapamilatan ning kasalpantayanan, e king panakit:)
Manalig kami, ngaku pin, at bisa kesa king mabating king katawan, at ati king Ginu.”
~ Kadwang Korintyanu, Dangka 5: Sunis 6-10
(2 Corinthians 5:6-10)
“Atin kung balung tau kang Kristu
a king milabas a labing-apat a banwa mekulung ya king katlung banwa.
Nung ati yu man king lub ning katawan
o makalwal ya king katawan e ku balu—balu ning Dyos.
At balu kung ing taung ini--nung ati yu man king lub ning katawan
o makalwal ya king katawan e ku balu—
balu ning Dyos—mesukul ya king paraiso
at mekarandam bage e malyaring ipasyag,
bage alang ninu mang mipabustang sumabi.”
~Kadwang Korintyanu, Dangka 12: Sunis 2-4
(2 Corinthians 12:2-4)
***
Ding talasalpantaya karing alus sablang kasalpantayanan at paralan ning pamanyamba, ing belwan dikil king nung ninu itamu tagana--nung e malabug—bina na ping madalumdum. Iti bista ma’t karing Banal a Kasulatan at king tuturu da ring sugu ning Apung Ginu lakwas na king Ginung Yesukristo malino nung nanu tamu o ninu itamu. King bye na’t angga na king keyang“kamatayan” pepamalit na kekatamu a aliwa itamu ing katawan nung e itamu ing kaladwang pangsamantalang makatuknang king pangsamantalang katawan.
Magmula pamu keng pibale-bale mituturwanan na la ring bingut a “ya i John o ya i Mary”; a ya Kapampangan ya o Pilipinu ya; a ya lalaki o babai ya; a ya anak ya; a ya masanting o malagu ya. Pane ngan makaparikil keng katawan na at alang nanu man ing dikil keng kaladwa na bista ma’t mituturwanan yang ya “Kristyanu” ya, “Muslim” ya o nanu mang bansag da karing talasalpantaya nung nu ya makabilang.
Karing sunis a menibatan ning Biblya king babo, malino a aliwa itamu ing katawan--nung e itamu ing kaladwa a malyaring lumwal o lungub king makalabwad a katawan. Dakal pang pamanalimbawa ing mayayakit karing aliwang dangka da ring aliwang aklat at aliwang Banal a Kasulatan, dapot anting talatuki nang Yesukristo, king Biblya ta na pamu manalumpakan.
Ing Lubusang Katutwan e ya makibage king nung nanu ing manayun, masampat o makawili king manigaral kaniti nung e bubusni na king makabusni mu namang pusu ing alang mangabiran a kamatutwanan.
Mapilan a pamipalino. Nung kapututan tamung gamat o bitis, itamu pa mu rin itamo? Nanu namu wari ing e malyaring palitan king katawan ngeni? Alus ala na. Nung malyaring palitan la reti, buri nang sabyan aliwa itamu ing katawan. Ing daya asna na kasaguling palitan ngeni. Lakwas na reng ipan at bwak.
Ing katawan mengari ya keng saken at ing kaladwa ya ing makasake magmaneu king saken. Inya mu gagana ya uli ning magmaneu. E uli na ning makina o gasulina. Agyang ati lu reta nung alang magmaneu e ya pa mu rin sumulung ing saken.
Agpang kareng scientists deng cells da reng katawan tamu miyayalilan la ngan kilub ning 7-8 a banwa. Uling mipapalitan la ngan deti, aliwa itamu ing katawan. Buri nang sabyan nita, ing katawan mu inyang milabas a walung banwa ganap neng aliwa na king ngeni. Lakwas na ing katawan mu inyang bingut ka.
Anti mu rin, kamate ning katawan ing sablang tanda ning bye mabating. Pamangisnawa, tibuk ning pusu, pamangdagul o growth, pamagdakal o reproduction, kimut, panamdam at lakwas na ing pamangisnawa Atin pang aliwa.
Anti king mumunang sunis, masasabi a ing laman at daya (sangkap ning katawan at katawan mismu) e ya malyaring miras king kayaryan ning Dyos. Dapot agkatan na katamung muli o mibalik ning Dyos king Keyang kayaryan at ita itamu—deng kaladwa.
Masampat yang pisasabyan ini dapot keng kakulangan ning makaparikil a dekalan ding amanu at penandit--angga ne pa keni at pataran ne pa ing pisasabyan. Aldo maslag, abe!
***
PAMANGAPAMPANGAN: Atin lang kasebyan deng mangatwang Kapampangan a maralas kung dandaman kareng apu o pengari ku. Iti ya pin ing “mangalag ka kaladwa.” Sasabyan da iti neng e ku bisang mangan neng bengi. Atin ping misan dinan da kung uling balat bang sabyan da karin ya linwal o dinalan ing kaladwa. Mali pala ita. Itamu pala ing kaladwa inya e malyaring sabyan ing kaladwa ku o kaladwa mu uling ing makibandi ya pin ing kaladwa keng katawan at aliwa ing katawan king kaladwa.
***
Masayang aldobeytan king kapat kung supling—Siddhan “Sid” Garcia king kekang katlumpulu’t adwang banwa nake`ti king masala. Pagnasan ku ing kekang tagumpe king sablang dane ning kekang pamibye-bye, Sid.
***
PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan a misulat king pigmulan at tune kulitan kambe ning dalise at mapagmasabal a pamisip at parasan. Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.
Malyaring sumulat king garciakragi@yahoo.com para karing kutang o munikala.