Binasi sa Isaias 35:4-7; Salmo 146; Santiago 2:1-5; Marcos 7:31-37
USA sa mga kinaham nga pulong sa kasamtangang panahon mao ang “toxic”. Kaniadto gipasabot niini kanang makahilo nga “chemical” kondili man gani mga basura nga makahilo. Ang “toxic waste” gikan sa mga butang nga la kaayo o basura nga radyoaktib. Bisan dili kini mahikapan, mapadul-an lang, makadaot sa lawas sa tawo. Mao nga kinahanglan magpahilayo niini. Kinahanglan ilubong kini sa lalom kaayo nga lugar para walay maangin. Sa atong kasamtangang kalibotan, ang “toxic” mahimo sad nga mga tawo nga makapabug-at, magdalag gubot, kansang presensya o mga pulong makadaot sa lawas ug kalag.
Tungod niini likayan ang mga “toxic” nga mga tawo. Morag mao kini ang gihimo ni Jesus sa dihang gidala kaniya ang usa ka bungol ug amang aron ayohon niya: “Ug gipahilayo niya siya nga siya ra gikan sa panon sa katawhan.” Kusog baya mobugalbugal ang mga tawo sa adunay depekto. Apan aduna pa siyay laing gihimo: “Iyang gibutang ang iyang tudlo ngadto sa iyang mga dalunggan ug human makapangluwa gihikap niya ang iyang dila. Ug human siya mihangad ngadto sa langit, nanghupaw siya ug miingon kaniya, ‘Ephphetha,’ sa ato pa, ‘Maabli ka!’”
Gipuli ni Jesus ang iyang kaugalingon sa “toxic” nga kinaiyahan. Gibutang niya iyang tudlo, simbolo sa iyang gahom, sa dalunggan sa tawo. Dili “toxic” kun luod ang luwa ni Jesus kay adunay pagtuo sa ilang panahon nga ang laway kuno makaayo sa pagkabuta. Nanghupaw siya, timailhan sa iyang kasuko sa yawan-ong gahom nga “toxic” sa tawo. Unya miingon siya: “Maabli ka!” Susama ang pulong (“maabli”) ang gigamit sa pagkatawo sa unang anak kay siyay moabri sa sabakan sa inahan. Gigamit usab kini sa yugto nga mamatay ang unang martir, si San Esteban, sa dihang miabli ang langit. Pisikal ug espirituhanon diay ang pag-abri. Mahimo kini ni Jesus.
“Toxic” ning kahadlok. Makapugong kini sa daghang kaayohan. Mimando ang Ginoo pinaagi ni propeta Isaias nga wagtangon ang kahadlok. Pulihan ang kahadlok sa mga katingalahang panghitabo, sama sa pagkaayo sa depekto sa lawas ug pagsubwak sa sapa sa lugar nga awaaw. “Toxic” pod ning kinaiya nga mopalabi sa mga sapian kaysa kabos. Mipahinumdom si Santiago nga “gipili sa Dioa ang mga kabos aron maadunahan sa pagtuo ug manununod sa kabilin sa gingharian.”
Kahadlok ug ang nakaminos nga kinaiya ngadto sa mga kabos “toxic”. Nanginahanlan kini sa pag-abri sa hunahuna ug kasingkasing. Gahom lamang sa Dios ang makahimo sa kabag-ohan kay lalom ang atong kangitngit.
Aduna pa ba kitay laing kinaiya o panghunahuna nga angay abrihan sa gahom sa Dios aron mabatonan nato ang tinuoray nga kagawasan ug kalipay?