MOKABAT sa 540 ka ampoules sa Nubain nasakmit sa kapulisan gikan sa usa ka tawo sud sa usa ka dormitoryo sa N.Bacalso avenue, Barangay Sambag 1, dakbayan sa Sugbo alas 10 sa miaging gabii.
Giila ang suspek nga si Louei Minardo Goopio, 24, giilang “Nubain queen,” taga Jakosalem street, dakbayan sa Sugbo.
Ang suspek adunay tulo mga kakonsabo nga sila si Gerald Amador,24; John Rey Molinio,24; ug Albert Coguia,35.
Ang suspek nasikop sa gipahigayon nga buy-bust operation human namaligya og 10 ka ampoules sa Nubain sa usa ka poseur buyer nga pulis.
Atol sa pagpangita og dugang pa nga mga ebidensya, adunay 540 ka ampoules sa Nubain ang nakuha sa kapulisan nga gipanag-iya sa suspek.
Matod sa suspek, ang iyang supplier sa mga ampoules taga Manila.
Ang drugas ibiyahe pinaagi sa courier ug giingon nga iya rang tagbuon sa airport.
Saysay ni Chief Inspector Maria Theresa Macatangay, hepe sa Abellana Police Station, nga paliton ni Goopio og P100 kada usa ka ampoule sa Nubain sa iyang supplier.
Iya kining ibaligya sa tag P250 kada usa sa siyudad sa Sugbo.
Ingon pod ni Macatangay nga imbestigahon pa nila ang maong kaso kon giunsa sa pagsulod sa mao nga drugas dinhi sa Sugbo agi sa airport.
Dugang ni Macatangay tag 1,000 ka ampoules ang order ni Goopio sa iyang supplier.
Nasuta pod nga ang mga kustomer niini mga habal-habal driver, bar girls, trabahante, manggamitay og shabu ug posible pod mga estudyante.
Ang suspek usa sa high value target sa kapulisan ug apil sad kini sa watchlist sa City Drug Enforcement Unit. Maria Jenesis Empasis, CIT-U Intern