BISAN kon nasubo si Cebu Archbishop Jose Palma sa padayon nga sunodsunod nga pagpatay nga nahitabo dinhi sa Sugbo, iyang gidasig ang katawhan nga padayon mosalig sa Ginuo ug sa Birheng Maria nga naga-uban sa panaw.
Ang arsobispo nipadayag og kasubo sa mga krimen nga nahitabo bisan sa pag-ampo sa simbahan sa oratio imperata nga nangaliyupo sa kahitas-an nga mahunong na ang pagpatay.
Apan bisan niini, siya niawhag sa katawhan nga padayon nga mag-ampo aron hikapon ug matandog ang kasingkasing ug hunahuna sa mga nagpaluyo sa krimen.
“We pray unta ma-touch pud unta ang heart, ang mga hunahuna ug kasingkasing whoever are the perpetrators kay we know the tears, we know the sadness, we know the sorrow nga bunga niining mga pagpatay,” padayag ni Palma dihang nahinabi sa mga tigbalita.
Sa kasaulogan sa sumad sa adlaw nga natawhan ni Birheng Maria, ang arsobispo nidasig usab sa mga tawo nga bisan sa mga hagit ug pagsulay sa kinabuhi, motan-aw, moduol ug mosalig sila kang Mama Mary.
Iya kining gipakasama sa usa ka bata nga iyang nakit-an kagahapon atol sa prosesyon nga gikapoy og nilakaw ug niduol sa iyang inahan.
“I said to myself, mao kini kita, as we walk with Mary perhaps there maybe times kapoy ta sa walk pero salig kita, di kita biyaan sa atong inahan. Salig kita o kapuy na nga daw di na kita makaabot kon kita lang, our mother will carry us,” dugang ni Palma.
Ang arsobispo maoy nangu sa Walk with Mary nga nanukad sa Fuente Osmeña Rotunda paingon sa Cebu Metropolitan Cathedral, siyudad sa Sugbo kuyog ang 27 ka mga karusa sa lainlaing mga imahen sa Birheng Maria.
Si Chief Inspector Maria Theresa Macatangay, hepe sa Fuente Police Station sa Cebu City Police Office (CCPO), nibanabana nga niabot og 10,000 ka mga tawo ang niapil sa prosesyon.
Sumala ni Palma ang Walk with Mary nagpakita sa pagpasalamat ug pagdawat sa katawhan kang Maria, ang inahan sa Diyos.
Matod niya, naga-uban na sa panaw sa katawhan ang Birheng Maria nga apil na daan sa plano sa Ginuo sukad sa unang pagkasala sa unang mga ginikanan ug pagsaad sa Diyos nga moabot ang manunubos.