MAS gipakusgan karon sa Philippine Drug Enforcement Agency (PDEA) Davao Region ang ilang kampanya sa pagbatok sa ilegal nga druga gumikan sa mga bag-ong kahimanan nga ilang nadawat gikan sa nasyunal ning bag-o lang.
Kini ang gibutyag ni PDEA-Davao director retired Senior Superintendent Antonio Rivera kinsa miangkon nga di pa gyud mahurot ang mga drug pushers ug users sa Davao Region.
Sumala ni Rivera, nga matag karon ug unya padayon silang naghimo og koordinasyon sa komunidad aron masikop ang mga nahisgutan.
Apan giingon sa opisyal nga ginagmay na ang ilang operasyon gumikan nagnihit na ang ilegal nga druga sa rehiyon tungod sa hugot ug gipakusgan nga kampanya sa pagbatok niini.
“Naa gyod gihapon, pero nihit na kaayo, gumikan ni sa atong gipakusgan nga programa sa pagbatok niini,” sulti ni Rivera.
Gitumbok sa opisyal mao ang Davao del Norte diin sa miaging bulan, usa ka drug den ang ilang nabungkag sa Tagum City.
Nasundan sab kini sa pagkasikop sa laing lima ka mga tawo kinsa gituohang nag-pot session sa usa ka balay sa Purok 1, Bacuring, Baranay Magdum, alas 7 sa gabii niadtong Miyerkules. (Jeepy P. Compio)