NISAMPOT sa kuwestiyonabling panagtabla ang panagsangka tali sa duha ka mga Filipino fighters nga sila si Donnie “Ahas” Nietes ug Aston Palicte nga alang unta sa nabakanting World Boxing Organization (WBO) super flyweight title didto sa The Forum sa Inglewood, California.
Human sa dose ka hugna nga sinukliay sa kumo, ang tulo ka judges nakakab-ot sa split draw nga decision nga nakapasagmuyo sa kampo ni Nietes kinsa gibati og kasagmuyo sa maong hukom.
Si Judge Robert Hoyle, sa iyang score card nitali og 116-112 nga pabor kang Palicte samtang ang laing judge nga si Daniel Sandoval adunay 118-110 nga score alang kang Nietes. Apan ang ikatulong judge nga si Max Deluca nitabla sa away, 114-114.
Ang unofficial tally sa HBO human sa fourth round nagpakita og tabla ang score, 38-38, apan sa ikalima ka round nibalik ang kainit ni Nietes.
Nagpadayon ang pagsulbong ni Nietes sa nisunod nga mga hugna apan adunay rounds nga momenor ang panumbag sa giilang Ahas, samtang walay hunong mga nisugal kanunay sa pagharong ug gitungod tungoran si Nietes ni Palicte.
Si Harold Lederman sa HBO, sa iyang unofficial scoring, mipadaog og dako Nietes, 117-111.
Sa interview human sa away, si Nietes nipadayag nga nidaog siya sa maong away apan napildi siya sa pipila ka mga judges. Matod niya, nga kon milampos pa lang gyud unta siya sa maong away, tuyo unta niya nga hiusahon ang tanang mga bakos sa 115 lbs.
Aron paghatag og katagbawan, gusto ni Nietes nga makig-rematch sa iya ra usab nga katagilungsod nga si Palicte.
Sa iyang bahin, andam usab si Palicte nga modawat sa hagit ni Nietes kinsa taliwala sa tabla nga desisyon padayon gihapon kining wala makatilaw og kapildihan sukad pa niadtong Septiyembre 2014 sulod sa 34 na ka away.
Si Palicte pabiling may 24 ka daog, 2 ka pildi ug aduna na karoy usa ka tabla. (Daniel Quindao Guden, US Correspondent)