SUKAD sa paglingkod ni Mayor Rody Duterte pagka-presidente niadtong tuig 2016, walay hunong si Senador Antonio Trillanes sa pagsaway sa iyang administrasyon nga daw sa wala na nay tarong gibuhat ang presidente, puro nalang sayop.
Gidamay sa nasampit nga senador ang pamilya sa pangulo, hinungdan nga gipa-resayn sa amahan ang iyang anak sa pagka-Vice Mayor sa atong siyudad sa Davao, Paulo Duterte; ug gilambigit ni Trillanes sa shipment sa shabu nga nagkantidad og P6.4 billion.
Nag-ugat ang proclamation number 572 sa atong pangulo, sa dihang giimbestigahan ni Trillanes ang Vigilant Security Agency nga kaugalingon ni Solicitor General Jose Calida, nga nakakontrata sa mga ahensiya sa atong gobyerno.
Klaro nga sa kasuko ni Calida, gipangitaan niya og bikil si Trillanes, ug kini mao ang pag-ukay sa iyang rekord sa pagka rebeldeng sundalo niadtong tuig 2003 ug 2007.
Usa sa mga bikil nga nakita ni Calida mao nga wala mag-apply og amnestiya ug wala mo-angkon nga guilty siya sa iyang pagrebelde panahon sa administrasyon ni kanhi presidente Gloria Macapagal Arroyo si Trillanes.
Taas pa kaayo ang panahon sa pagdungog niining kasoha, ug kining tanan mosangko didto sa Korte Suprema kun diin ang bag-ong tinudlo sa atong presidente nga si Chief Justice Teresita de Castro maoy katapusang magdesisyon, ug ang mga kauban ni de Castro.
Alang nako ngadto kang Trillanes, kinahanglan magmata kana, ug hunahunaon nga di imo ang tanang panahon.
Sa panahon ni kanhi Presidente Benigno Aquino, daghang mga anomaliya, pero, hilom ka, tungod kay imo ang presidente, pero karon kay di naman, maong pagpuyo, ug maniid nalang sa mga maayong gihimo sa administrasyon karon.