DI sama sa piliay ang pagsabot niining mga survey nga kinahanglang pareho gyud og rating ang mga boto ka kandidato usa kita makaingon nga tabla.

Kon survey na ang hisgutan, duna kanay “plus and minus” nga allowance para sa sayop.

Mao nga kon atong basahon kining survey nga nabalita karon, di labaw si Mayor Tomas Osmeña. Tabla na

Click here for stories and updates on the Sinulog 2010 Festival.

Apan alang kanako, di kini ang mahinungdanon sa maong survey. Kon atong hinuktokan, si Tomas dugay na kaayo nga mayor sa Syudad sa Sugbo ug, kon tinuod nga maayo kaayo ang iyang performance, kusog unta kaayo ang iyang suporta sa south district.

Samot pa nga pildi kini si Atan sa miaging piliay sa 2007. Ato sab nga iapil sa atong pagkwenta ang mga pagpanglawgaw sa BO-PK sa mga kalihukan ni Atan diha sa distrito sama sa pagpanangtang og mga basketball board ug sa ilang pagpabaha og mga tulda ug lungon.

Apan natabla sila sa maong survey. Buot ipasabot, nakakuha gyud diay si Atan og suporta nga katunga sa mga botante sa maong distrito. Hinuon, layo pa gyud ang piliay ug daghan pa ang mahitabo gikan karon hangtod sa Mayo 10. Tan-awn unya nato kon unsa pay pahitabo sa sunod nga mga adlaw niining nagka-alegre nga sangka sa South District.

Comelec control?

Malambuon ang ekonomiya sa Syudad sa Lapu-Lapu ug makapabalaka alang sa mga lumolupyo sa maong dakbayan kining siging panawagan nga ibutang sa control sa Commission on Election (Comelec) ang piliay diha.

Sa akong pagbasa sa mga balita, klaro man nga way relasyon sa pulitika ang mga patay sa maong dapit. Lahi ra man kini sa nahitabo didto sa Maguindanao.

Magbaton unta og gamayng responsibilidad ang oposisyon sa paglabay og mga isyo. Makadaot man gud kini sa maayong imahen sa maong dapit ug dayon sa ekonomiya. Ambot kon nakasabot ba ang oposisyon diha.

Ang ako lang nga mahimo man unta lalisan nila kon unsaon pa pagpalambo sa syudad ug di magsigi niining mga isyo nga makapagan sa tanan.

Edu

Naluoy ko niining nahitabo ni Edu Manzano sa lalawigan sa Sugbo nga wa makakuha sa suporta ni Gob. Gwen Garcia ug sa One Cebu Party. Nabalita na man gud nga sa miaging Suroy-Suroy sa Sugbo, gianunsyo na nga si Sen. Loren Legarda mao ang mosunod nga bise president sa Pilipinas.

Buot ipasabot, nag-Gibo Teodoro-Legarda na ang One Cebu ug wa mosunod sa party standard bearer sa Lakas-Kampi.

Sayang kay alang kanako maayo nga tawo kini si Manzano nga grabi ang performance dihang siya pa ang hepe sa Optical Media Bureau (OMB) nga maoy nigukod sa mga pirated DVD ug CD.

Sa laing bahin, nagpasabot ba sab kini nga kalambuan nga gi-junk sa kampo ni Loren Legarda ang iyang president nga si Villar?