NISIAW na usab ang mga kaboang ining mga sakop sa duha ka gang, ang Bloods ug Crips. Niadtong miaging adlaw, usa ka batan-on ang gipatay sa usa ka sakop sa Crips kay nanimawos. Apan ang biktima nga si Jeko Kent Tumulak Rosalita, dili man daw sakop sa karibal nga grupo didto sa Pardo. Na-aan lang daw.

Click here for stories and updates on the Sinulog 2010 Festival.

Niadtong miaging gabii laing hitabo na usab diin grupo sa batan-on nga nangaon og barbecue, gi-ataki usab ug mga miyembro sa gang. Usa ang nadunggaban. Nigrabe ang ingkuwentro niining maong duha ka mga gang labi pa sa squatter areas ning dakbayan. Kasagaran sa mga sakop niini mga batan-on nga wala na mag-eskuwela. Apan aduna usay mga estudyante nga mga badlungon.

MASUMPO

Ambot kon masumpo pa ba kaha kini sa atong kapulisan? Maayo ra ba unta nga kon sila ray mangamatay kon magka-ingkuwentro. Ang problema kay adunay mga inosente ug dili mga sakop sa duha ka gang ang mapagan. Unya kining maong mga batan-on agresibo ra ba kaayo. Mopatay gyud.

Dako og papel ang atong mga ginikanan, komunidad ug ang atong mga awtoridad sa pagsumpo niining mikuyanap nga gang war. Ang mga ginikanan maoy unang modisiplina sa ilang mga anak nga miapil ning maong mga grupo. Unya ang atong mga opisyal sa barangay mohimo unta usab ug lakang pina-agi sa pagpakig-dialogue sa mga gang members. Unya ang atong kapulisan kinahanglan usab nga motinuod sa paggukod sa mga nahilambigit ning maong grupo panahon nga makahimi sila og krimen.

GOBIYERNO

Apan subo kaayo palandungon nga ang kagamhanan wala kaayo magpakabana sa kahimtang ning mga batan-on nga wala mag-eskuwela. Katungod man unta kini sa gobiyerno ang paghatag og suporta sa mga out of school youth.

Ang Republic Act  9344 [The Juvenile Justice and Welfare Act of 2006] nagmando man unta sa mga local government unit nga mohimo og programa alang sa mga batan-on nga wala magtungha aron sila magiyahan ug mapalayo sa criminal activities.

Ambot og pila ra kaha ka mga LGU ang nituman niini? Ang Cebu City adunay Task Force on Street Children. Apan unsa-on man nga ang nga batang libud-suroy di man pod mamuyo diha. Manglayas man unya mamalik lang gihapon sa kalsada. Unya ra ba kon kining maong mga batan-on makakomiter og krimen labi pa kadtong ubos sa 15 anyos dili puwedeng mapasaka-an og kaso.

(bgnalzaro@gmanetwork.com)