SUPERBALITA CAGAYAN DE ORO

Todino: Ampo ni Gatchalian

Pro Bono

GIAMPO ni Fr. Noel Gatchalian nga magkasakit si Presidenti Rodrigo Duterte. Dunggon ba kaha sa Dios kining matang sa pag-ampo? O kinsa ba nga dios ang giampoan ni Gatchalian?

Dili kini personal nga mag-ampo kay gipadayag kini mismo sa publiko. Gihimo ang pag-ampo atol sa misa para ni Senator Antonio Trillanes IV gawas sa building sa Senado.

Mao tingali ni unang higayon nahitabo sa nasod diin ang pari nag-ampo alang sa kadaotan sa pangulo.

Kon nagbasa pa unta kini sa Bibliya si Gatchalian mahibawo siya mohatag og respeto ngadto sa presidenti. Ngano man?

Ang pagkapili ni Duterte, bisan gibotohan kana siya sa katawhan, ang Ginoo gihapon maoy nagbutang niya sa maong katungdanan.

Palihug basa ra gud Garchalian sa Daniel 2:21 “Ug iyang ginailis-ilisan ang mga panahon ug mga katuigan; iyang ginapapha ang mga hari, ug gipahaluna ang mga hari; siya nagahatag kaalam sa mga manggialamon, ug kahibalo kanila nga may pagsabut.”

Kon imong nasabtan, kabubot-on sa Ginoo kon kinsa mang pangulo o hari nga modumala sa usa ka nasod. Dili nato masukod, masabtan ug matuhop ang katuyoan sa Ginoo, labi na kon makita nato nga “mangil-ad o daotan” ang klase sa pangulo nga midumala sa usa ka nasod. Ang labing importanti, kontrolado sa Ginoo ang tanan, ug mosalig lang ta niya.

Kon wa ka mahimuot ni Duterte, sama ra nga gikwesiyon nimo ang Ginoo.

Kining paria bitaw maayong tudloan unsaon pag-ampo. Di ba naghatag man si Hesu-Kristo og giya unsaon nato pag-ampo diha sa Mateo 6:9-13. Sa maong bersikulo duna bay gihisgutan nga pag-ampo aron mabutang sa kadaot ug magkasakit ang tawo?

Gawas pa, gitudlo sa Dios nga higugmaon nato ang kaaway. Abliha imong Bibliya Gatchalian diha sa Mateo 5:44 “Apan ako nagaingon kaninyo higugmaon ninyo ang inyong mga kaaway, panalanginan ninyo ang mga panghimaraot kaninyo, buhata ang maayo sa mga nagadumot kaninyo, ug pag-ampo kamo alang sa mga nagabuhat kaninyo sa dautan ug nagalutos kaninyo”

Dili lang higugmaon ang kaaway, gusto sa Ginoo nga panalanginan pa gani nato kadtong nanghimaraot, unya ipakita ang pagkamaayo ngadto sa nagdumot.

Gatchalian paminawa ning ampo sa bata: “Among Dios nga makagagahom nga atua sa langit, among gihimaya imong ngalan, ikaw tag-iya sa among kinabuhi, dalaygon ka Ginoo. Patalinghugi among mga pangaliyupo, dungga among mga pag-ampo. Amahan namo, nasayod ka sa maong kaluyahon, lig-ona kami Dios. Ikaw ra among dalangpanan. Niining panahon sa kalisdanan, giyahi among pangulo ug mga lideres sa katilingban. Hatagi sila og kaalam nga makadumala subay sa imong kabubot-on. Ihatag nila ang kahimsog sa panglawas ug gamita sila Ginoo sa pagpatunhay sa kaangayan, gugma, ug pakigdait sa nasod.”

Kon lisod gyud nimo madawat si Duterte nganong di man ka maghulat sa lakang sa Ginoo. Tinuod, gihatagan ta og “katungod sa pagpili” apan importanti sab nga mangayo ta’g giya aron masubay sa Iyang kabubot-on ang bisan unsa mang buhaton nato.

Gipaklaro lang gyud hinuon ni Gatchalian unsa iyang pagbati ngadto ni Duterte. Maglisod ka sa pagtuman sa mando sa Dios nga “higugmaon nimo ang kaaway.” Ug mao na ang usa sa imong kaluyahon Gatchalian. Unta nag-ampo ka og igong kusog sa pagbagyo sa imong batasan, dili kay imong nuntan ang daotan nimong laraw. Kinsa pa may parokyano nga motuo nimo nga ikaw mismo wa man magserbisyo nga tiunay sa Ginoo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph