TEST. Ang petsiyon nga gisang-at ni Sen Antonio Trillanes Korte Suprema nga nagkwestiyon sa Presidential Proclamation 572 nga nagrebokar sa iyang amnesty nga gipirmahan ni kanhi Presidente Noynoy Aquino usa ka pagsuway sa independencia sa hudikatora.
Atong mahinumduman nga sa pag-asumir ni Chief Justice Teresita de Castro iyang gi-anunsyo nga ang Korte Suprema ubos sa iyang pagdumala independente na sa duha ka departamento, ang ehekutibo ug magbabalaod sa kagamhanan.
Si CJ De Castro gitudlo ni Presidente Duterte human natangtang si kanhi Chief Justice Maria Lourdes Sereno pinaagi sa petisyon nga qou warranto imbes nga impeachment unta ang maghusgar diin ang senado maoy magsilbing impeachment court.
Ang pagrebokar sa amnesty ni Trillanes gibase sa giingon nga wala makumpleto ang dokumento ug sa wa pag-angkon ni Trillanes sa iyang sala nga pag coup de etat sa duha ka higayon sa panahon ni kanhi Presidente Gloria Macapagal-Arroyo, nga karon Speaker of the House na.
Apan, matud sa mga taho, si Trillanes nakasumitir sa tanan rekisitos alang sa iyang aplikasayon sa amnesty. Kon ang mga abogado de kampanilya ang pasultion ang pagrebokar sa amnesty ni Trillanes wa mohaum o subay sa ensakto nga proseso.
Tungod sa pagrebokar sa iyang amnesty si Trillanes pinaagi sa iyang mga abogado mipasaka og petisyon sa Korte Suprema nga nagkwestiyon sa PP 572 tungod kay walay gipasikaran nga legal. Dinhi ning petisyon ni Trillanes matestingan ang liderato ni CJ De Castro ug sa iyang gipasidaan nga independente na ang hudikatora.
Gani, naay mga storya nga ang nagpatangtang sa amnesty ni Trillanes mao si Solicitor General Jose Calida, nga nagatubang og imbestigasyon sa komite ni Trillanes sa senado sa isyu nga conflict of interest tungod kay ang iyang security agency ang nagwardiya sa mga opisina ug ahensya sa kagamhanan.
Human sa malamposon nga quo warranto batok ni kanhi chief justice Sereno dako og pagtuo si Calida nga mahibalik sa prisohan si Trillanes kon mapamatud-an nga wa maensakto ang papeles sa amnesty ni Trillanes. Gani, ang military nag-andam na sa court martial batok ni Trillanes.
Tulo ka dagkong tawo ang mahimuot o malipay kon mabalhog og balik sa prisohan si Trillanes. Sila si Presidente Duterte tungod sa nanghinobra nga panawayni Trillanes sa iyang administrasyon, si Speaker Arroyo ug si Calida.
• • •
PRESS FREEDOM. Nagsige na ang preparasyon pagselebrar sa Cebu media sa Cebu Press Freedom Week nga pagasugdan sa Sept. 15. Ang lead convenor karon sa selebrasyon mao ang Cebu Daily News nga gipangulohan ni editor Edra Benedicto.
Ang Press Freedom Week nga gisugdan og mugna ni Atty. Cheking Seares ug mga kauban nahimo nga usa na nga tinuig nga selebrsayon matag Septiyembre diin mao ni ang buwan nga gideklarar ni kanhi Presidente Ferdinand Marcos ang Martial Law niadtong Sept. 21, 1972. Ang selebrasyon sa Cebu media ning mahinungdanon nga higayon usa ka pagdumdum nga niadtong panahon sa martial law ang Cebu media nagpabilin nga gawasnon ug independente.