DI na unya ka kinahanglang molupad pa sa laing nasud aron makasinati og snow.
Kini kon hingpit na unya nga ablihan ang Snow World didto sa Brgy. Calajoan, lungsod sa Minglanilla.
Usa lang ang Snow World sa daghang mga attraksyon nga imong makita sud sa Anjo World Theme Park nga gikatakdang ablhihan karong Disyembre.
Matod ni Chester Lim, presidente sa Belmont One nga gawas sa theme park, sud sa 3.5 ektaryang luna nga nahimutangan niini mao ang nagkadaiyang retail stores, restaurant, hotel, convention center, supermarket ug ang ilang branch sa Belmont Hardware.
“For the first time in a tropical country, you will experience snow. We’re so excited about this Snow World. Snow world is just one of the attractions of Anjo World Theme Park,” matod ni Lim sa dihang nahinabi sa Superbalita Cebu.
Dinhi sa Pilipinas, anaa sa Star City sa Manila ang una nga Snow World.
Apan sumala ni Lim nga mas dako ang Snow World sa Sugbo kompara sa kauluhan.
Gibutyag ni Lim nga i-post unya nila sa ilang Facebook page ang mga butang nga kinahanglang ipreparar niadtong buot mosud sa Snow World sa unang higayon.
Sa sulod, una ninyong mataak ang preparation room diin moubos ang temperatura ngadto sa 10 degrees Celsius.
“In the room, the people will be told about the safety precautions, do’s and don’ts, and if naa moy mga sakitsakit, if they have such illnesses, they can still be refunded with their ticket. Because di ta gusto nga i’g sud nila, mogawas sila tungod kay di nila makaya. So, we have to brief them for the safety of everyone at about 3 to 5 minutes depende if people have questions,” ni Lim.
Human sa preparation room, mosulod na ang mga tawo sa 3 ka andana nga Snow World diin mas moubos pa ang temperatura hangtd ngadto sa -10 degrees Celsius.
Makita dinhi ang mga maanindot nga mga ice sculptures sa world-class ice carvers.
Mahimo sab kamong maka-slide sa man-made ice slide nga naggikan sa ikaduhang andana sa maong pasilidad paubos.
Sa ikatulong bahin niini mao ang snow area diin mahimo kang magpuyo hangtod kanus-a nimo gusto, maka-inom og kape kay butangan man kini og coffee shop ug magduwa sa snow.
“This is a real snow where people can make snow balls and make whatever they want to make from the snow. Snow area is where they can stay the longest until di na nila makaya ang katugnaw,” matod ni Lim.
Anjo World Theme Park
Padayag ni Lim nga tuyo sa P500- milyones nga theme park nga makahimo og “family integrated entertainment complex” alang sa tanan.
“This is something that my parents want to bring to the people in Cebu. It’s like also giving back to them because Belmont is going 45 years this year. My parents travel a lot. And they want the people in Cebu to experience what is offered outside the Philippines,” matod ni Lim ning mantalaan.
Ang pangalan nga “Anjo” gikuha gikan sa pangalan sa iyang amahan nga si Antonio ug iyang inahan nga si Josephine.
Gawas sa Snow World, laing atngan unya sa publiko mao ang giisip nga ikaduha sa pinakadakong ferris wheel sa nasud nga anaa dinhi.
Sa usa ka higayon, mahimong masudlan og 5,000 ka mga tawo ang maong theme park maong subsob ang ilang pagpangandam sa seguridad ug pakigkoordinar sa lokal nga kagamhanan ilabi na sa trapik kon ablihan na unya kini sa publiko.
Wa pa gibutyag ni Lim ang mga presyo sa rides ug sa uban pang mga atraksyon apan iyang gipasalig nga kini affordable kaayo sa mga Sugbuanon ug mao sab kining makabalikbalik (unlimited).
Sud sa sa maong complex ang 27 ka mga retails shops, 6 ka restaurants, Robinsons Supermarket, 15 ka slots sa food park, 30-room hotel nga ilang himuon nga 60-room ug convention center nga adunay 500 seating capacity.
Di sab maproblema ang publiko sa parking sanglit kapin sa 200 ka mga sakyanan ang makaparking sa tungang bahin sa complex diin masudlan sab kini og 15 ngadto sa 20 ka mga bus kon adunay mga dagkong grupo nga mohimo sa ilang corporate events, birthdays, school tours ug uban pa.
Himuan sab unya nila og jeepney stop sa sulod sa complex aron di magbabag ang mga jeep nga makamugna og trapik sa highway.
Gipanglatawan sa management sa Anjo World Theme Park nga dagsaon sa publiko ang ilang pagpangabli nga gi-target karong Disyembre.
Dugang niya nga mahimo unya nilang hagit ang mga mobisita sa theme park nga “makalitan” ilabi na kon makasinati sa snow.
Unang gianunsyo sa pag-abli sa theme park niadtong Hulyo ning tuiga. Kini gisugdan og trabaho sa milabayng tuig.