HUMAN niya girepresentahan ang Pilipinas sa 2018 Asian Games, ang Cebuana Olympian marathoner nga si Mary Joy Tabal aduna na sab laing gipuntyerya – depensaan ang iyang titulo sa 42nd Milo Marathon Finals karong Disyembre ug 30th Southeast Asian (Sea) Games sa sunod tuig.
Ang 29 anyos nga marathoner mosuway paglabni sa iyang ikaunom nga sunodsunod nga titulo sa Milo Marathon nga gikatakda karong Disyembre 9 sa Laoag City.
Apan sa dili pa siya modagan sa Laoag City, si Tabal molarga’g balik sa Italy aron ipadayon ang iyang pagbansaybansay sa Tuscany Training Camp.
Gitug-an ni Tabal nga posibling sunod buwan mobalik na siya sa Italy aron makompleto na ang iyang usa ka tuig nga training nga gibayran na sa iyang sponsor nga mao ang Motor Ace Philippines.
Kini magsugod sa katapusang buwan sa Nobiyembre, tug-an ni Tabal sa interbyu sa Sun.Star Cebu.
Si Tabal nag-training sab sa Italy alang sa Asian Games nga gipahigayon sa Indonesia sa miaging buwan. Nahiluna siya sa ika-11 nga dapit sa 42-kilometer race.
Gibutyag sa multi-awardee nga Sugboanong runner nga iyang nasayran nga ang Milo Marathon Finals maoy usa sa gihimo karong qualifying round sa national athletes alang sa ika-30 nga Sea Games.
Ang lumad nga taga Brgy. Guba, Cebu City milangkat og gold medal sa 29th Sea Games sa Singapore.
Tinguha niyang depensaan ang titulo hilabi na kay ang Pilipinas maoy mo-host sa matag duha ka mga tuig nga kompetisyon. RSC, ESL