IMBESTIGADOR sa pagpamusil sa barangay Pangan-an, isla sa Olanggo, dakbayan sa Lapu-Lapu nagtuo nga dunay bulok pulitika ang pagpusil patay sa supporter ni Mayor Arturo Radaza.

Apan wa magpasabot nga dunay nagpaluyong pulitiko sa pagpatay sa supporter sa mayor.

Sumala ni SP01 Rolito Jumao-as sa Crime Against Person’s Desk sa Lapu-Lapu City Police Office (LLCPO) nga dunay political color ang maong hitabo sanglit nag-ugat ang kasungian sa pulitiko nga paluyohan.

Click here for stories and updates on the Sinulog 2010 Festival.

Asoy ni Jumao-as nga si Nicasio Pogoy gikalalis sa grupo sa iya ra usab nga ig-agaw nga si Arnulfo Pogoy sa lider nga ilang suportahan atol sa piniliay.

Base sa imbestigasyon nga sa pagpauli ni Nicasio gikan sa diskohan uban sa laing kauban gikasugat niini si Arnulfo diin pulos sila hubog.

Nahitabo ang panaglalis nga niresulta sa lamok-lamok hinungdan nga niresponde ang mga barangay tanod ug giingong nipasalba.

Giingong gikasuko sa kampo ni Nicasio ang pagpasalba sa tanod hinungdan nga maoy giatubang apan giingong gipusil na hinuon ang biktima.

“Way political leader nga nagsugo nga ipapatay ang biktima. Aduna lay heated altercation kaniadto regarding kon kinsay suportahan,” nagkanayon si Jumao-as.

Samtang si kanhi Pangan-an barangay kapitan Virgilio Casiao nagtinguhang mosang-at og kasong obstruction of justice batok kang barangay kapitan Climaco Tatoy Jr.

Si Casiao uyoan ni Catalina Pogoy, asawa sa biktima.

Matod ni Casiao nga didto sa balay ni Tatoy magtago ang mga suspek.

Siya niingon nga wa motug-an an dayon ang kapitan ngadto sa kapulisan nga diha ra sa iyang balay ang mga suspek nga sila si Benigno Menguito, Jerry Lanoy, Joselito Melleno ug Arnulfo Pogoy.

Mga suspek gibalhog na sa Lapu-Lapu City Police Office (LCPO).

Sa sayo pa, ang mga kauban ug pamilya ni Pogoy nagrtuong dunay bulok pulitika ang pagpatay kaniya.

Kini tungod kay nagpaluyo siya kang Radaza samtang ang mga suspek tua kang Konsehal Junard “Ahong” Chan, lider sa oposisyon sa konseho sa Lapu-lapu.

Buot sa grupo ni Chan nga ipailawom sa Commission on Elections (Comelec) control ang siyudad tungod sa giingong political violence human patya ang iyang lider.

Apan supak ang kampo ni Radaza niini kay matod sa kapulisan, ang pagpatay kang Allan Berame niadtong Disyembre 31 way labot sa pulitika, kon di sa giingong relasyon sa usa ka babaye. Wa pay laing kalambuan sa kaso hangtod karon. (FVQ)