“Kung madayon nga mabilanggo pag-usab si Trillianes, posibleng mameligro usab ang amnestiya sa uban niyang kauban sa Magdalo nga anaa na karon sa oposisyon.”
MANAGKALAHI ang opinyon sa katawhan kabahin sa isyu sa amnestiya ni Senador Antonio Trillanes IV.
Una nilakaw si Presidente Rody Duterte sa opisyal niya nga pagbisita sa Israel ug Jordan, nagpaguwa kini'g kamandoan sa pagbaliwala sa amnestiya sa oposisyon nga senador nga gihatag kaniya sa administrasyon ni Presidente Noynoy Aquino.
Mahinumdoman nga duha ka higayon nga nanguna si Trillianes ug ang iyang grupo nga Magdalo og kudeta batok ni kanhi Presidente Gloria Macapagal-Arroyo (PGMA) tungod sa naghitak nga kurapsiyon ug pagbaliwala sa kahimtang sa mga kasundalohan.
Sa duha ka higayon wala nagmalampuson ang Magdalo ug gibilanggo si Trillianes ug ubang mga kauban sulod sa sobra usa ka tuig.
Apan nakadaug si Trillanes pagka-senador sa duha ka higayon hangtud nga gipaguwa siya sa iyang higala nga si PNoy Aquino.
Sa wala pa ang amnestiya sa administrasyon ni PNoy, gipailawom si Trillanes ug mga kauban sa Magdalo og Court Martial proceedings sa Armed Forces of the Philippines. Kung di ko masayop, puwede silang mahukman og life imprisonment ngadto sa death sentence kung mapamatud-an nga sad-an sila sa salang “Treason” o pagluib sa estado isip mga sundalo sa gobyerno.
Apan tungod sa amnestiya sa presidente, wa matiwas ang Court Martial.
Karon may nakitang buslot ang administrasyon ni PRody sa amnestiya ni Trillianes busa gibaliwala kini sa presidente ug gipabalik ang pagtaral kaniya pinaagi sa Court Martial.
May balita nga si Solicitor General Jose Calida ang naghunghong sa pangulo nga ibaliwala ang amnestiya sa senador.
Hasta ang Department of Justice niuyon nga may sipyat ang amnestiya sa senador.
Sa laing bahin, gibati'g kabalaka ang oposisyon nga risbak na kini ni PRody kang Trillianes nga way puas nga nibalikos sa pangulo ug sa iyang pamilya.
Kung madayon nga mabilanggo pag-usab si Trillianes, posibleng mameligro usab ang amnestiya sa uban niyang kauban sa Magdalo nga anaa na karon sa oposisyon.
Sa pagkatinuod, usa ako sa nahibulong sa nahitabo karon tungod kay dili diay garantiya ang amnestiya nga gihatag sa pangulo.
Daghan nang binilanggo nga gihatagan og amnestiya sa nanglabay'ng panahon ug kung madayon kining pagbaliwala kang Trillianes, hastang daghana nga puwedeng taralon pagbalik.
Gawas kung sakto ang gibati sa oposisyon nga paagi kini sa kasamtangang administrasyon sa pagpahilom kanila, angayan gyud nga mabalaka si Trillianes.
Wala pay orden de aresto nga gipaguwa. Hinuon, sakto ang ilang gibuhat nga mopasaka og petisyon batok sa bag-ong mando sa pangulo ngadto sa Korte Suprema.
Dinhi makita ang katag kung makuryente ba ang pangulo sa dili sakto nga hunghong ni Soc-Gen Calida o may wala mabuhat si Trillanes aron mahatagan og amnestiya.