DUHA ka mga kandidato pagka konsehal alang sa May 10, 2010 election sa dakbayan sa Talisay ang gidungog nga moatras sa ilang kandidatura.

Ang duha mao ang negusyanteng si Aldin Diaz sa Liberal Party (LP) ug Josephine Leuterio,ang presidente sa Talisay City Women’s Federation (TCWF) nga usa ka independente.Kaubang kandidato ni Diaz nga si Danny Caballero nitug-an sa Sun.Star Superbalita nga nakadungog sab siya sa maong taho.

Click here for stories and updates on the Sinulog 2010 Festival.

Gibutyag ni Caballero nga daghan nang mga meeting sa LP ang wa matambungi ni Diaz ug wa na sab nila kini ikauban sa ilang mga lakaw.

Wa sab makatambong si Diaz sa tigum sa mga lider sa LP sa Talisay niadtong Dominggo sa hapon nga gitambungan nila ni gubernatorial candidate Hilario Davide,III ug ni Bise Gobernador Gregorio Sanchez.

Apan si Diaz nga nahinabi sa Sun.Star Superbalita nipasabot nga na-busy siya sa daghan niyang appointment sa iyang negusyo hinungdan nga wa na siya makahigayon sa pagtambong sa mga kalihukan sa ilang grupo.

Matod ni Diaz nga mopadayon siya sa pagdagan ug moseryuso sa iyang pagpangampanya inig abot sa campaign period. Ang bana ni Josephine nga si Ireneo Leuterio nikompirmar sa Sun.Star Superbalita sa pag-atras sa iyang asawa.

Si Ireneo nga maoy campaign manager sa laing kandidato sa LP nga si negusyanteng Dory Emit nag-kanayon nga siya mismo nihangyo sa asawa sa pag-atras.

“Si Sir Dory nihatag na man og commitment sa pagdala sa kawsa sa kababayen-an nga maoy katuyuan ni Mam Jojo (Leuterio) mao nga mo-withdraw na lang siya,” matod ni Ireneo. (VLM)