Dear Atty. Joan
Ako diay si Linda. Naa koy anak na dalagita, itago nato sa pangalan na Belinda. Si Belinda kay 15 anyos pa lamang. Nahibaw-an nako na naa diay siya uyab na 30 anyos na.
Ilang gitago ang relasyon kay kabalo siya na di pa mi ganahan mag-uyab-uyab na siya kay bata pa. Nahibaw-an lang namo ang ila relasyon kay niistorya si Belinda nga duha na siya ka buwan na buntis. Sakit kaayo sa among dughan ang panghitabo kay minor de edad pa kaayo ang amng anak.
Giingnan mi sa iyang uyab nga iyang daw pakaslan amo nganak inig-abot niya sa saktong edad, pero di gyud namo madawat ang nahitabo sa among anak.
Pwede ba mapasakaan namo og kaso ang uyab sa among anak bsan nagkasinabtanay silang duha?
Salamat.
Linda
Dear Linda,
Oo. Pwede ninyo mapasakaan og kaso na child abuse ang uyab sa imo anak.
Sigon sa atong balaod,Article 3, Section 5 sa RA 7610, “Those who commit the act of sexual intercourse of lascivious conduct with a child exploited in prostitution or subject to other sexual abuse” masilotan kini. Pasabot ani, ang pakighilawas sa bata, bisan ning-uyon siya sa panghitabo, kay masilotan kini.
Giingon sa atong Korte Suprema na “wala’y bili ang pag tugot sa usa ka minor de edad na bata kong nakalapas sa Sec. 5, Art 3, RA 7610. Mao walay pulos ang argumento na manag-uyab sila.”
Ang pagtugot sa imong anak sa ila relasyon kay dili mahimo na depensa kay ang gibuhat sa iya kay nakalapas sa RA 7610. Ang tumong sa balaod kay panalipdan ang mga minor de edad sa ila mga desisyon sa kinabuhi na dli pa nila ma tugkad.
Atty. Joan
Pahibalo: Kini opinyon lamang nga nag-base sa inyong lakbit-saysay ug kini pwede nga mausab kun dugang pa nga mapatin-awan ang mga detalye. Kon adunay pa kamoy mga pangutana nga adunay kalabutan sa katungod sa mga bata, mahimo kamong mo-message pinaagi sa among Facebook account CLB.