Pacquiao mokiha sa Top Rank Inc.

Kiha. Gibutyag ni Manny Pacquiao nga nagplano siyang ikiha ang Top Rank Inc. gumikan kay hangtod karon, wala pa niya nadawat ang iyang bahin sa TV rights sa Amerika sa ilang away ni Lucas Matthysse niadtong Hulyo 15 sa Kuala Lumpur, Malaysia. (businessinsider.com)
Kiha. Gibutyag ni Manny Pacquiao nga nagplano siyang ikiha ang Top Rank Inc. gumikan kay hangtod karon, wala pa niya nadawat ang iyang bahin sa TV rights sa Amerika sa ilang away ni Lucas Matthysse niadtong Hulyo 15 sa Kuala Lumpur, Malaysia. (businessinsider.com)

GIBUTYAG ni Manny Pacquiao nga nagplano siyang pasakaan og kaso ang Top Rank gumikan kay wala pa siya hatagi og bayad sa iyang bahin sa TV rights sa Amerika sa iyang away batok kang Lucas Matthysse niadtong Hulyo 15 sa Kuala Lumpur, Malaysia.

“Congratulations and good luck to @TRboxing and @ESPN on your 7-year partnership agreement. I know both of you have been very busy finalizing the deal. However, I have not received the U.S. rights payment for my July 15 fight against Lucas Matthysse that was broadcast on ESPN plus,” tweet sa Pambansang Kamao sa Pilipinas nga napatik sa GMAnews.tv.

“Therefore, I am initiating legal proceedings against Top Rank and all other parties based on the non-payment and attempt to restrict my future rights. Thank you.”

Sa ilang away ni Matthysse, midaog si Pacquiao pinaagi sa seventh-round knockout aron angkunon ang World Boxing Association (WBA) welterweight title.

Sa laing bahin, nakakuha og 20-0 nga boto ang ikatulo ug katapusang pagbasa sa balaod kabahin sa pagtukod og Philippine Boxing and Combat Sports Commission, kansang katuyoan mao ang pagseguro sa kaluwasan ug kaayuhan sa tanang Pinoyng mga boksidor ug mga atleta sa ubang combat sports.

Ang Senate Bill No. 1306 o “Philippine Boxing and Combat Sports Commission Act of 2018” gipasaka ug gi-sponsor ni Senador Pacquiao, kinsa usa ka eight-division world boxing champion.

Sa sayo pa, misupak niini si Senator Franklin Drilon, kinsa mitanyag sa pagtukod sa Philippine Boxing Commission inay sa PBCSC.

Gipasabot ni Drilon nga dili na kinahanglang magtukod og laing ahensya kabahin sa boksing ug uban pang combat sports gumikan kay ubos na man kini sa pagdumala sa Games and Amusements Board (GAB).

“Instead of creating a new body, the present Games and Amusements Board [should] be monitored closely, we provide them with additional funds. If there are 22 fields of sports that they are supervising, then we provide them with enough manpower,” batbat pa ni Drilon dihang gidibatihan ang gipasakang balaod ni Pacquiao niadtong Marso sa miaging tuig.

Sa iyang bahin, gipasabot ni Pacquiao nga kuwang ang serbisyo sa GAB gumikan kay aduna lang kini 154 ka mga empleyado nga nagpadagan og 22 ka sporting events.

Gipasabot ni Pacquiao nga ang PBCSC langkuban og chairperson ug upat ka mga miyembro ug ubos kini sa administrative supervision sa Office of the President.

Nakasaad sa PBCSC nga ang tanang professional boxers ug combatants iparehistro sa Social Security System (SSS), National Health Insurance Program-Philippine Health Insurance Corporation (PhilHealth), ug Home Development Mutual Fund (PAG-IBIG).

Nagkanayon si Pacquiao nga nagkinahanglan kini og physical ug medical examinations.

Nidugang si Pacquiao ang PBCSC mohatag sab og panginabuhian sa mga retiradong boksidor lakip na sa mga mangaangol.

“We are aware that some have met their untimely death due to the lack, if not absence, of safety and emergency medical services while others face retirement without any kind of financial assistance or access to medical care,” pasabot ni Pacquiao. ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph