GIKONDENAR sa national chairman sa Alpha Sigma Omega International Service Fraternity and Sorority, Ramir Salonoy ang nahitabong hazing ngadto sa 12 ka mga menor de edad sa dakbayan sa Lapu-Lapu.
Gibutyag ni Salonoy nga giwagtang na karon sa fraternity ug sorority group ang traditional nga paagi nga initiation rites alang niadtong buot magpasakop sa maong pundok, ilabi na ang hazing ingon man ang verbal abuse.
Ang pagpaubos sa hazing wa maghatag og kasigurohan nga magpabiling loyal ang usa ka miyembro, pasabot ni Salonoy sa dihang nahinabi sa SuperBalita Cebu.
“We, the Alpha Sigma Omega International Service Fraternity and Sorority are saddened by the news that such activities are still proliferating in spite of the existing National laws on anti-hazing,” opisyal nga pamahayag sa fraternity group.
Sa sayo pa, 12 ka mga minor de edad ang naluwas sa Police Station 2 sa Lapu-Lapu City Police Office niadtong Domingo sa gabii, samtang tulo ka hamtong ang gibilanggo sa dihang naatlan nga nag-hazing kay buot magpasakop sa Young Blood Gangster.
Ang mga na-rescue nga kabataan nag-edad 12 anyos ngadto sa 15 anyos diin upat niini mga babaye ang kasamtangang gipahiluna sa Home Care Center sa kagamhanan sa Lapu-Lapu.
Si P01 Brilyen Zozobrado, Police Stn. 2 nagkanayon nga ang ilang buhatan nakadawat og tawag gikan sa concern citizen sa Barangay Mactan kabahin sa maong mga batan-on nga naghimo og initiation rites sud sa usa ka abandonadong balay sa Sityo Bagong Silingan sa nahisgutang barangay.
Naabtan sa responding team ang mga batan-on samtang ang tulo ka mga lalake nga gihulagway nga maong nangulo sa initiation rites ang gipusasan.
Giila ni Zozobrado ang mga gidakop nga sila si Charlie Degamo, 19, Grade 9 sa publikong tunghaan sa Mactan; Jevan Enecita, 21, istambay ug Jomari Sulit, 21, trabahante sa timbangan og gitumbok nga maoy founder sa Young Blood Gangster.
Nakuha ang usa ka paddle nga adunay marka sa pangalan sa gang.
Nasayran gikan ni Sulit kinsa Tagalog speaking nga moabot na ngadto sa 30 ang ilang kinatibuk-ang miyembro.
“Hindi man kami nag-recruit sumasama lang naman sila (minor de edad) sa amin,” matod pa ni Sulit nga adunay pinaso-an sa kilid nga bahin sa tuong kamot nga nagsilbing marka nga sakop sa pundok.
Si Degamo kansang ginikanan miduaw sa buhatan sa Police Station 2 sa pamasin nga ilang mahangyo ang arresting officer nga mapagawas sa bilanggoan ang ilang anak kay na-absent kini sa iyang pagtungha.
“Nadala lang kos kabuang. Nagmahay gyud ko,” tug-an ni Degamo nga gitudlo sa iyang kauban nga maoy tigbunal sa paddle ngadto sa minor de edad nga nagpa-miyembro.
Nanglugmaw sa mga luha ang mata ni Ginang Christine Degamo, 39 sa gidangatan ni Charlie kinamaguwangan sa upat niyang anak ug wa siya magdahom nga ingon niini na kalawom ang gikalambigitan sa iyang anak sa pagtuo nga magkuyog-kuyog lang sa iyang mga barkada.
Samtang si Enecita hugtanong mihimakak nga nalambigit siya sa fraternity o gang, sumala pa gi-apil siya og sikop nga naabtan nga nag-inom sa dapit sa dihang mirespondi ang mga pulis.
Base sa Anti-Hazing Act of 2018 human nga gipabug-atan ni Presidente Rodrigo Duterte ang ipahamtang nga silot batok sa mga nalambigit sa hazing o pag-torture ngadto sa gi-recruit nga neophyte, ang mabilanggo sa tibuok kinabuhi ug makamulta og P3 milyones. FVQ