SECTIONS
Thursday, September 20, 2018
SUPERBALITA CAGAYAN DE ORO

Berganio: Salom kuyog ang whaleshark

SUPER LAAG

SULIT kaayo ang akong ekperyensya sa akong bag-ohay lang nga laag sa Cebu niadtong Agusto.

Nabawi ang matag adlaw nga kakapoy sa sige og sulat, sige ug huna huna unsaon paghan-ay og storya aron adunay maayong balita nga ikaalagad alang sa mga readers pagkaugma.

Nalipay kaayo ko sa imbitasyon sa akong soud kaayo nga higala si Jeraquel Malon ug iyang bana nga si Henry, kuyog pod si Ate Margs nga always on the go nga mao ra mi og prinsipe ug prinsesa atol sa among pagbisita.

Food trips and laag pa more! Salamat kaayo.

Kung aduna man pinaka dabest nga laag nako sa Sugbo kini gyod ang uban og salom sa whale sharks kon butanding didto sa Oslob.

Naila ang ilang lugar ug maayo tungod sa whale shark swimming and watching.

Kung imong tan-awon ilang dagat, normal lang kini kaayo...mas pino pa ngani kaayo atong puti nga mga balas dinhi kon itandi didto apan diay ang ilang hiyas makita nimo ilawom sa dagat pinaagi sa linte.

Dili ikalimod gidagsa siya sa libo libo ka tao, foreigner, ug uban pa nga gustong masaksihan ug makauban og salom ang daghang whaleshark sa ilawom.

Kini maoy nakapa-boom ug maayo sa ilang turismo.

Excited ug medyo hadlok imong bation kon imong makita ang daghang shark sa ilawom, dagkog mga baba nga moduol kanimo nga feeling nimo tukbon ka, naa pay mga ikog nga molabtik gamay sa imoha apan matud sa ilang mga boatmen nga anad na kini sila kaayo.

Binahogan ug masaksihan nimo alas 6:00 sa buntag pinakataas ang alas 12:00 sa udto.

Siyempre daghan ang gidili sa imong pakigsalom kanila, dili mohaplas og sunblock, mopalayo ug upat ka metros gikan kanila ug walay flash ang camera.

Sa kantidad nga P500 matag usa ka tao mahimo na nga maka swimming, samtang P300 ang watching sulod sa 30 minutos.

Akong tips kaninyo pag swimming gyod kay kon naa lang ka sa pumpboaT ang ikog lang gyod sa shark imong masil-ip. Siyempre aron sab memorable ang imong pagsalom, andama ang imong water resistant camera aron click-click nalang ka underwater.

Super Suroy! Super Laag gyod alang nako sa Cebu ang pakig swimming kauban ang mga shark. Suwayi lang aron dili ra kaayo ka ma-shaks!


VIEW COMMENTS