LUYO nga andam na ang tanan nga delegasyon sa Davao nga makigtigi sa 2018 Batang Pinoy National Championship nga himuon sa dakbayan sa Baguio nga ablihan karong Septyembre 15, miatras kini tungod sa Bagyong Mangkhut nga misulod sa nasud adlaw’ng Miyerkules.

Pormal kining gipahibawo sa gihimong pamahayag ni Mayor Inday Sarah Duterte nga gi-post sa City Information Facebook Page, “It is with a heavy heart that we cancel the trip of the 301 Davao City delegates to Baguio City for the Batang Pinoy sports competition. This is to ensure that the delegates will not be caught stranded in bad weather. We cannot compromise on the safety of the children, coaches, and support staff.”

Una niini, gisulti ni Mikey Aportadera, Sports Development Division-City Mayor's Office (SDD-CMO) officer-in-charge, nga prayoridad gyud sa mayor ang seguridad sa mga atleta, “Safety comes first gyud na. It is the ultimate priority especially sa mayor. When we found out that the super typhoon already started. So, we need to safe everybody. Dili pod mi gusto mag-take og risk na we know kung unsa ang effect ani during weekend,” atol sa pakighinabi kaniya human sa opening program sa 2nd Philippine Sports Commission (PSC) Volleyball Tournament sa Davao City National High School Multi-purpose Gym Miyerkules.

Dugang niya nga nasultihan na sab ang mga ginikanan sa mga atleta mahitungod sa desisyon diin nasabtan kini.

Samtang nagpagawas sab dayon og pahimangno ang PSC Miyerkules sa hapon nga gikanselar na ang opening ceremonies sa maong torneyo tungod sa bagyo apan ang kompetisyon magpadayon nga sugdan sa Lunes, Septyembre 17, aron ang ubang delegasyon makabiyahe nga luwas padulong sa lugar nga pagahimuon.

Apan luyo niini, wala pay tubag kon ikonsidera sa lokal nga gobyerno sa Davao nga mopadayon og biyahe sa sunod mga adlaw aron makaapil sa nasyonal nga kompetisyon.