“Ang amnesty usa ka buluhaton nga mahimo lang sa Pangulo sa nasud alang sa usa nga napamatud-an nga nakasala sa balaod o miangkon nga sila sad-an.”
WAY undang ang paghagit ni Senador Antonio Trillanes IV kang Pangulong Rodrigo Duterte sa miagi nga mga panahon nga daw kinaiya sa usa ka bata aron mapakita kinsa gyud kanilang duha ang hawod.
Makadaghan sab nga siya nagkanayon nga bugo ang Presidente ug dili kasaligan ug dili angayan mangulo sa nasud.
Ang ulahi iyang gihagit si Pangulong Digong sa usa ka IQ test aron makita sa katawhan ug iyang mapamatud-an nga mas utokan siya.
Wa nagdahom ang senador nga diay gipangitaan na siya'g buslot diin posible nga masulod siya sa laang ug usa milupad si Digong sa nasud sa Israel duna na kini gipirmahan nga Proclamation No. 572 nga nagmando sa kasundalohan ug mga pulis nga dakpon si Trillanes tungod gibawi na sa Presidente ang iyang amnestiya sa iyang kaso sa pagpangulo sa Oakwood mutiny 15 ka tuig na ang milabay.
Hinungdan matud sa Pangulo sa pagbawi sa amnesty, mao ang wala pagpangayo ni Trillanes niini ug ang wala pag-angkon sa iyang sala nga nahimo sa nasud.
Kahinumdoman nga ubos sa pamunoan ni Presidente Benigno Aquino III apan wala kunoy record sa buhatan sa Department of National Defense, walay nahipos nga mga dokumento nga nag-apply og amnesty si Trillanes.
Gimao-mao lang diay ang iyang amnesty aron magawas gikan sa bilanggoan?
Mao ni ang basihan sa pagpagawas sa Proclamation No. 572 nga nakaukay sa katawhan labi na sa mga abogado nga sublion pagtan-aw ang Constitution o Batakang Balaod sa nasud kon nasubay o wala ang mando sa Pangulo.
Ang amnesty usa ka buluhaton nga mahimo lang sa Pangulo sa nasud alang sa usa nga napamatud-an nga nakasala sa balaod o miangkon nga sila sad-an.
Kon kini gikahatag ni Presidente Benigno Aquino III kang Trillanes, puwede ba kining bawion sa mosunod nga mga Presidente?
Walay nasulat sa Constitution sa atong nasud nga basihan nga puwedeng bawion ang pasaylo nga gikahatag na ngadto sa usa ka tawo kay gikalimtan na ang iyang mga kalapasan.
Tungod walay nasulat nga mga basihan. Dili sab puwede matud pa sa mga abogado nga magbuhat og hinungdan aron puwede buhaton ang wa nasulat sa balaod.
Apan daghan ang natahap nga basin mahisama sa quo warranto case ni Ma. Lourdes Sereno, puwede sab ang laing senaryo sa kaso ni Trillanes.
Sa akong yano nga pagsabot lisud magkahiusa ang mga Filipino ug magpabilin ang katawhan nga magkabulag-bulag tungod sa politika.
Ang resulta katawhan gihapon ang mag-aguwanta sa kalisud kay dili nato makab-ot ang tinuod nga kalamboan.