DUGANG biyahe sa mga barko ang gipaabot nga kanselado karong adlawa tungod gihapon sa padayong pagkusokuso sa bagyong Ompong sa nasod.
Pasado alas 3:00 sa hapon kagahapon dihang nakasulod na sa Philippine Area of Responsibility (PAR) ang maong bagyo.
Apan pipila ka oras palang sa wala pa mosulod ang giingon nga usa ka supertyphoon nga si Ompong sa nasod, nideklarar na ang Philippine Coast Guard (PCG) 7 nga kanselado na ang mga biyahe sa barko sa Sugbo ug Bohol karong alas 12 sa udto.
Pasabot ni LT JG Michael John Encina, ang operations officer sa PCG 7 nga tanang biyahe sa tanang pantalan sa Sugbo ug sa Bohol, kanselado kini.
Apan kinahangalan gihapon og monitoring ug coordination alang sa kadtong mga barko nga gawas sa Sugbo ug Bohol diin mao ang port of destination niini aron masiguro nga luwas ang mga pasahero ug mga tripolante nga sakay niini.
Kagahapon nagtagpo ang nagkadaiyang ahensiya sa gobyerno alang sa Emergency Response Preparedness for Typhoon Ompong diin gipangulohan sa Office of the Civil Defense (OCD) 7.
Gitambungan kini sa nag-unang ahensiya sa gobyerno gikan kapulisan, kabomberohan, local government units, Philippine Coast Guard, Pagasa, ug uban pa.
Blue alert
Matod ni OCD 7 regional director Concepcion Ornopia, nga anaa na sila sa Blue Alert isip pagpangandam sa maong bagyo, nagpasabot kini nga 50% na sila nga andam.
Ilaha na usab nga gipahibawo ang nagkadaiyang local government units (LGUs) aron andam na kini sa maong bagyo bisan paman nga dili kita direkta nga apektado niini apan tungod sa hanging habagat hinungdan nga dako gihapon ang posibilidad sa casualties niini.
Kusog nga uwan
Masinati sa Sugbo ang kusog nga uwan sugod ugmang adlawa, Biyernes ug Sabado.
Matod ni Engr. Oscar Tabada, ang pangu sa Pagasa Visayas nga init ngadto sa madag-umon nga panganod pa ang masinati karon apan ugma, kusog nga hangin ngadto sa kusog nga uwan ang masinati diin moabot sa 30-50 kilometers per hour (kph) ang gibana-bana nga gikusgon sa hangin.
Moabot usab sa 1.5 metros ngadto sa 3.5 metros ang bawod sa open sea.
Gipanglantawan nga molandfall ang maong bagyo apan sa amihanang bahin na kini sa Luzon.
Gilauman usab nga mogawas na kini sa PAR sa Dominggo.
Kaandam sa LGU
Kagahapon, dili unta gusto nga palargahon sa Provincial Disaster Risk Reduction Management Office (PDRRMO) head Baltazar Tribunal Jr., ang mga atleta sa probinsiya nga magtigi sa Batang Pinoy sa Baguio City apan dihang nipasalig ang Philippine Sports Commission nga anaa sila’y contingency plan alang sa mga atleta, nadayon og biyahe ang mga atleta kagahapon.
Kasagaran hinuon niini nag-eroplano ug kon mobati ang panahon sa Luzon, i-istar una kini sila sa Manila bag-o modayon sa Baguio.
Cebu City
Sa dakbayan sa Sugbo,padayon nga gimonitor karon kining Busay Elementary ug National High School human nabantayan kini nga aduna’y minor nga pagdahili sa yuta.
Matod ni Harold Alcontin, operations officer sa Cebu City Command Center nga usa ning barangay Busay nga haduol sa posibilidad sa pagdahili hilabi na og grabe ang pagbunok sa uwan.
Gibutyag usab ni Alcontin nga aduna 19 ka barangay ang highly susceptible sa landslide samtang 9 usab alang sa flood prone. HBL