BISAN asang angle, instagrammable!
Kini ang akong mahulagway sa labihan ka tsada nga lokasyon sa Tubajon Aquamarine Park sa Laguindingan Misamis Oriental.
Kung plano nimo nga magbonding kuyog imong pamilya sa weste nga bahin sa Misamis Oriental perfect nga suhestiyon ang Aquamarine Park sa Tubajon.
Kini makita 40 minutos ang biyahe gikan sa siyudad sa Cagayan de Oro paingon sa Laguindingan.
Mogawas sulod ang turista sa lungsod gumikan kay dinhi nahimutang ang Laguindingan Airport.
Perfect nga irekomenda ang Tubajon Aquamarine Park tungod sa labihan kalimpyo nga dagat nga bisan maghapon og babad sa kadagatan dili gyod ka mapul-an.
Ma-relax sab kag lantaw sa 22 ka ektarya nga pulos bakhawan nga maoy nipalibot sa kadagatan mao nga kung imong ligoan dili ra kaayo ka mainitan.
Dinhi sab taliwala sa mga bakhawan makit-an ang mga cottages gitukod nga gama sa kawayan. Kini mokantidad og P300 ngadto P500 ang renta.
Sa entrada palang daan dili na gyod ka madak-an
Kay ang entrance fee niini P25 lamang ang dagko, ug P15 sa mga kabataan.
Unang pagbisita nako sa lugar niaging mga semana gumikan naimbitahan nga makaduyog sa familiarization tour alang sa mga media nga giorganisa sa Provincial Tourism Department sa pagpangulo ni Atty. Jeffrey Saclot.
Samot nga nakapa-wow kanako tungod sa inisyatiba sa mga opisyales sa Tubajon nga maghimo og tulay gama sa kawayan.
Taas-taas sab imong baklayon kamulo ka og lantaw sa kolor green nga palibot ug pag-abot sa katapusan tulay nga kawayan motagbo nimo ang huyohoy sa hangin ug limpyo nga dagat nga lami dayon kaayong sawoman.
Dako og papel ang kalimpyo sa lugar hinungdan naangkon sa lungsod ang labing unang pwesto sa Malinis at Masaganang Karagatan 2017 atol sa Gawad Saka awards nga gitunol mismo ni Presidente Rodrigo Duterte didto sa kaulohan.
Dabest gyod ang kalimpyo!
Pahindumdom lang sa moadto ayaw ug hugaw hugaw didto!